جامبىل وبلىسىندا اۋىر قىلمىستار ازايىپ, جەڭىل قىلمىستار وسكەن

تاراز. 28 قاڭتار. جامبىل وبلىسىندا قىلمىستىق قۇقىق بۇزۋشىلىق 10,3 پايىزعا وسكەن. بۇل تۋرالى جامبىل وبلىسى پرپوكۋراتۋراسىنىڭ ءباسپاسوز قىزمەتى حابارلادى. بۇل جەڭىل قىلمىستار سانىنىڭ 49,3 پايىزعا وسۋىنەن بولىپ تۇر. ايتپەسە وڭىردە اسا اۋىر قىلمىستار سانى 8,3, اۋىر قىلمىستار 0,3 جانە ورتاشا اۋىر قىلمىستار 9,8 پايىزعا تومەندەگەن. وتكەن جىلى وبلىستىق پروكۋراتۋرامەن 18 مىڭ زاڭبۇزۋشىلىق انىقتالىپ, مەملەكەت پايداسىنا 1 ميلليارد تەڭگەدەن استام سوما ءوندىرىلىپ, 70 مىڭ ازاماتتىڭ كونستيتۋتسيالىق قۇقىعى قورعالىپتى. سونداي-اق, كاداسترلىق قۇنى 220 ميلليون تەڭگە بولاتىن جەر تەلىمدەرى مەملەكەتكە قايتارىلىپ, 800 ميلليون تەڭگە بولاتىن بيۋدجەت شىعىنىنىڭ الدى الىندى. سىبايلاس جەمقورلىققا قارسى كۇرەس سالاسىندا سوتقا دەيىنگى تەرگەپ-تەكسەرۋلەردىڭ ناتيجەسىندە تارتىپتىك جاۋاپكەرشىلىككە 116 تۇلعا تارتىلسا, ونىڭ 62-ءسى باسشى لاۋازىمىنداعى تۇلعالار. ولاردىڭ قاتارىندا سارىسۋ اۋدانى اكىمدىگى مادەنيەت ءبولىمىنىڭ باسشىسى اقدىلدا, مويىنقۇم اۋدانى اكىمدىگى تۇرعىن-ءۇي كوممۋنالدى شارۋاشىلىق ءبولىمىنىڭ باسشىسى تولەپبەرگەنوۆ, تالاس اۋدانى بويىنشا باداەۆ, مەركى اۋدانى اكىمدىگى جەر قاتىناستارى ءبولىمىنىڭ باسشىسى وسپانقۇلوۆ سوتتالسا, مەملەكەتتىك ساتىپ الۋ سالاسىندا قاداعالاۋ اكتىسى بويىنشا وبلىستىق ەنەرگەتيكا, تۇرعىن-ءۇي كوممۋنالدى شارۋاشىلىق باسقارماسىنىڭ باسشىسى تولەۋليەۆ, مويىنقۇم اۋدانى اكىمدىگىنىڭ اپپارات باسشىسى باياليەۆ قىزمەتتەن بوساتىلعان, ال شۋ جانە مويىنقۇم اۋداندارى اكىمدىگى اپپاراتتارىنىڭ باسشىلارى سىبايلاس جەمقورلىققا بايلانىستى جاۋاپكەرشىلىككە تارتىلعان. سونداي-اق, پروكۋرورلار پارمەنىمەن «وڭىرلەردى دامىتۋ» جانە «بيزنەستىڭ جول كارتاسى» سىندى مەملەكەتتىك باعدارلاماردى جۇزەگە اسىرۋ ناتيجەسىندە ۇلتتىق قوردىڭ 160 ميلليون تەڭگە سوماسىندا نەگىزسىز تولەمىنىڭ الدى الىنعان. پروكۋرورلاردىڭ وتىنىشتەرى بويىنشا سوتتارمەن 2,5 ميلليارد تەڭگەدەن استام قارىزى بار 24 جالعان كاسىپورىننىڭ تىركەۋى جويىلعان. سىرتقى ەكونوميكالىق سالادا كونتراباندانىڭ 29 دەرەگى انىقتالىپ, 50 ميلليون تەڭگەدەن استام سومانىڭ تاۋارى تاركىلەنىپ, پروكۋرورلاردىڭ 48 ءوتىنىشى بويىنشا سوتتارمەن مەملەكەت پايداسىنا 80 ميلليون تەڭگەدەن استام سومادا كونتراباندالىق تاۋارلار قايتارىلدى. وڭىرلىك كاسىپكەرلەر پالاتاسىمەن بىرلەسكەن جۇمىس بارىسىندا تابيعي مونوپوليالار مەن جەر قاتىناستارى سالالارىنداعى مىڭنان استام كاسىپكەردىڭ قۇقىعى قورعالدى. وتكەن جىل بويىنا پروكۋراتۋراعا 10 مىڭنان اسا زاڭدى جانە جەكە تۇلعا جۇگىنىپ, ولاردىڭ ءاربىر ءوتىنىشى بويىنشا تەكسەرىستەر مەن زاڭدى ءتۇسىندىرۋ جۇمىستارى جۇرگىزىلدى. ال وبلىستىق پروكۋراتۋرانىڭ باسشىلىق قۇرامىندا 3097 ازامات جەكە قابىلداۋدا بولىپ, ماسەلەلەرى قارالدى. ورالحان ءداۋىت. دەرەك: جامبىل وبلىسى پرپوكۋراتۋراسىنىڭ ءباسپاسوز قىزمەتى. سۋرەت: egemen.kz