ءتاۋىپ دەپ كەلىپ...

تاڭەرتەڭگىلىك جۇمىسقا كەلگەن «تۇركىس­تان» سالتانات سارايىنىڭ قىز­مەت­كەرلەرى ايران-اسىر قالعان. بىل­تىر عانا پايدالانۋعا بەرىلگەن, ءىشى-سىرتى جۇمىرتقاداي عيماراتتىڭ كوپ ەسىكتەرىنىڭ تالقانى شىعىپتى. ەدەندى ابدەن لاستاعان, قابىرعالاردى قاتتى زاتپەن ۇرىپ شۇرق تەسىك قىلعان. پوليتسەيلەر كوپ ۇزاتپاي كۇدىكتىنى ۇستادى. الماتى قالاسىنىڭ 21 جاسار تۇر­عىنى ەكەن. ۋىزداي جاس جىگىت جۇيكە اۋرۋىمەن اۋىرادى. اتا-اناسى ءبىر سەبى تيە مە دەپ شىمكەنتكە تاۋىپكە قاراتقالى اكەلگەن. جۇيكە اۋرۋلارى ديسپانسەرىندە ەسەپتە تۇراتىن جىگىت تۇندە قونعان ۇيدەن قاشىپ شىعىپ, «تۇركىس­تاننىڭ» جەرتولەسىن بۇزىپ, ىشكە ەنگەن. وسى وقيعاعا بايلانىستى وبلىستىق مادەنيەت باسقارماسىنىڭ باسشىسى كۇليا ايداربەكوۆاعا حابارلاستىق. – جىگىتتىڭ اتا-اناسى جاقسى ادامدار ەكەن. كەشىرىم ءوتىنىپ جاتىر. جۇيكە اۋرۋىمەن اۋىراتىن جىگىتتىڭ ءوز ارەكەتىنە ەسەپ بەرمەيتىنى تۇسىنىكتى, – دەيدى كۇليا حانىم. – بۇل دا اللانىڭ ءبىر سىناعى شىعار دەپ ءوز كۇشىمىزبەن تازالاپ, كەتكەن شىعىننىڭ ورنىن تولتىردىق. بالاسىنىڭ اۋرۋىمەن باسى قاتىپ, ءوزى ابىگەر بولىپ جۇرگەن جاندارعا سالماق سالمادىق. مەكەمە قىزمەتكەرلەرى وسىلاي ادام­گەرشىلىك جاساپتى. ال جاس جىگىت اقىل-ەسىنىڭ دۇرىس ەمەستىگىنە بايلانىستى دارىگەرلەردىڭ باقىلاۋىندا بولادى. باقتيار تايجان, «ەگەمەن قازاقستان». شىمكەنت.