ەلدىكتىڭ ەڭسەسىن بيىكتەتەتىن شەشىم

بيىل قازاقستان ءۇشىن ەرەكشە جىل, ەل تاۋەل­سىز­دىگىنە 25 جىل تولادى. بىراق, قازىر الەمدە ۇلكەن داعدارىس بولىپ جاتىر. داعدارىس ۇلكەن ەلدەر­دى دە, كىشى ەلدەردى دە قام­تىدى. مىسالى, قىتايعا دا, رەسەيگە دە, باسقا ەلدەردىڭ بارىنە دە داعدارىس ءوز زاردابىن تيگىزۋدە. بارلىق مەم­لەكەتتىڭ سول داعدارىستان قالاي شىعۋدى ويلاستىرىپ, جانتالاسىپ جاتقان جايى بار. ءبىزدىڭ قازاقستاندى الاتىن بولساق, پرەزيدەنتىمىز مەملەكەتتىڭ جۇمىسىن, ونىڭ اپپاراتىن كاسىبيلەندىرۋ جۇمىسىن جاقسارتۋ جونىندە ۇلت جوسپارىن جۇزەگە اسىرۋ بويىنشا ەل الدىنا اسقارالى مىندەت قويدى. سول مىندەتتەردىڭ ىشىندە, اسىرەسە, 5 ينستيتۋتتىق رەفورمانىڭ ورنى بولەك. ەندىگى جەردە مەملەكەتتىڭ جۇيەسى وسى رەفورماعا سايكەس دامۋى كەرەك. ال دەموكراتيالىق مەملەكەتتە جۇمىس ىستەۋ دەگەننىڭ ءوزى – زاڭمەن جۇمىس ىستەۋ دەگەن ءسوز. زاڭ ساپالىق جاعىنان ەڭ جوعارى دارەجەدە بولۋى ءتيىس. زاڭدى قابىلدايتىن پارلامەنت. پارلامەنت – مەملەكەتتىك بيلىكتىڭ ءبىر تارماعى. سول سەبەپتى, زاڭدى قابىلدايتىن دەپۋتاتتاردىڭ جاۋاپكەرشىلىگى وتە ۇلكەن. قازىرگىدەي قيىن-قىستاۋ جاعدايدا دەپۋتاتتار ويلانىپ-تولعانىپ, دەپۋتاتتىق كورپۋسقا, اسىرەسە, ماجىلىسكە بىلىكتى, دەڭگەيلەرى جوعارى, زامانعا ساي, ۇلت جوسپارىن كاسىبي تۇرعىدا جۇزەگە اسىرا الاتىن دەپۋتاتتاردىڭ كەلگەنى دۇرىس دەگەن توقتام جاسادى. ءسويتىپ, وزدەرىنىڭ وكىلەتتىكتەرىن مەرزىمىنەن بۇرىن توقتاتۋ جونىندە پرەزيدەنتكە ۇسىنىس جاسادى. مەملەكەت باسشىسى ولاردىڭ ۇسىنى­سىن قابىلداپ, بەسىنشى شاقىرىلعان پار­لامەنت ءماجىلىسىن تاراتۋ جونىندە, سونداي-اق, پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى. شىنىندا دا, ءبىز­دىڭ ءومىرىمىز, تاعدىرىمىز مەملەكەتپەن, ونىڭ ىشىندە مەملەكەتتىڭ زاڭىمەن تىكە­لەي بايلانىستى. دەپۋتاتتار ەڭ ساپالى زاڭداردى قابىلدايتىن بولسا, وندا ءبىز­دىڭ حا­لىقتىڭ ءال-اۋقاتىنىڭ ارتۋىنا دا, مەم­لەكەتتىڭ دامۋىنا دا ەلەۋلى ۇلەس قوسادى. ايتا كەتەتىن تاعى ءبىر ماسەلە, پارلا­مەنت ماجىلىسىنە سايلاۋ جاڭا دەپۋتات­تاردىڭ كەلۋىنە مۇمكىندىك بەرەدى, پارتيا­لاردىڭ دا بەلسەندىلىگىن ارتتىرۋىنا جول اشادى. پارتيالار ماجىلىسكە وزدەرىنىڭ قولدارىنان ءىس كەلەتىن, بىلىكتى تۇلعالارىن ۇسىنۋلارى كەرەك. قورىتا ايتقاندا, ەلباسىنىڭ وسىنداي ساليقالى شەشىمىن قولدايمىن, حالىقتى دا سونى قولداۋعا شاقىرامىن. جابايحان ءابدىلدين, اكادەميك. استانا.