الماتىدا يلليۋزيونيستەر باس قوستى

الماتى. 22 قاڭتار. وسى اپتادا الماتىدا وتاندىق يلليۋزيا ونەرىنىڭ وكىلدەرى باس قوستى. بۇل تۋرالى egemen.kz ءتىلشىسى حابارلادى. قازاقستان فوكۋسشىلارى ۇيىرمەسى ۇيىمداستىرعان باس قوسۋعا يلليۋزيا ونەرىندە 53 جىلدان بەرى جۇرگەن امەريكالىق دجيمم براۋن كەلدى. الماتىدا وسىنداي جيىن وتەتىنىن بىلە سالىپ, وزبەكستاننىڭ ۇزدىك سيقىرشىلارىنىڭ ءبىرى دميتري پوياكوۆ تا ۇشىپ كەلگەن. قالاداعى «سوزۆەزديە» ترەنينگ ورتالىعىندا وتكەن كەزدەسۋ بىرجاعىنان قازاقستاندىق يلليۋزيونيستەردىڭ ەكىنشى سەزى دەۋگە دە بولادى. ويتكەنى بۇل جيىنعا ەلىمىزدىڭ ءار تۇكپىرىنەن – استانا, الماتى, تالدىقورعان, وسكەمەن, قىزىلوردا, قوستاناي قالالارىنان 15 يلليۋزيونيست كەلگەن. «ءبىزدىڭ قازاقستان فوكۋسشىلارى ۇيىرمەسى 2012 جىلى قۇرىلعان. ۇيىمنىڭ 30 مۇشەسى بولسا, بۇتكىل ەلىمىزدە بۇل ونەرمەن 50-گە تارتا ادام اينالىسادى. ولاردىڭ كەيبىرەۋى فوكۋس كورسەتۋدى حوببي دەپ بىلسە, كوپشىلىگى يلليۋزيا جانرىنان نانىن تاۋىپ جەپ ءجۇر. ال يلليۋزيانىڭ اتاسى دەپ ەسەپتەلەتىن دجيمم براۋن مەنىڭ دە ۇستازىم», – دەيدى ونەرپاز جەڭىس ايتجانوۆ. سونىمەن كەزدەسۋگە كەلگەندەر اراسىندا تسيركتىڭ وسىناۋ ەرەكشە جانرىمەن جاڭادان اينالىسىپ جۇرگەندەر دە, كارىم مۇتىرعانوۆ, كامال قوڭقاراەۆ, التىناي بايتوقانوۆانىڭ شاكىرتى ءلاززات بايتوقانوۆا سياقتى تانىمال يلليۋزيونيستەر دە بولدى. يلليۋزيونيستەردىڭ بەيرەسمي سەزى كەزىندە دجيمم براۋن ءوز تاجىربەسىمەن ءبولىسىپ, جاس فوكۋسشىلاردىڭ ماشىعىن جەتىلدىرىپ, جاستاردىڭ ونەرىن دامىتۋعا ايتارلىقتاي ۇلەس قوستى, دەپ ەسەپتەيدى ءبىزدىڭ جەرلەستەر. ايناش ەسالي. دەرەك, سۋرەت: egemen.kz.