بولاشاق دەپۋتاتتار جەتەككە ىلەسىپ جۇرە بەرمەۋى كەرەك

قاسىمبەك مەديەۆ كەزىندە قاراعاندى وبلىستىق ءماسليحاتىن سەگىز جىلداي باسقاردى. ودان بەرىدە «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگىن قۇرىپ, اتالعان ۇيىمنىڭ العاشقى توراعاسى بولدى. بۇگىندە جاسى جەتپىستىڭ سەگىزىنە كەلگەن اقساقال ءالى تىڭ, قوعامدا بولىپ جاتقان وزگەرىستەردى ءجىتى قاداعالاپ وتىرادى. سول سەبەپتى, ەلباسى نۇرسۇلتان نازارباەۆ قازاقستان رەسپۋبليكاسى پارلامەنتى ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋىن كەزەكتەن تىس وتكىزۋ تۋرالى جارلىققا قول قويعاننان كەيىن كەش تە بولسا قوعام قايراتكەرى قاسىمبەك مەديەۆكە جولىعىپ, بىرنەشە سۇراق قويىپ, وي-پىكىرىن بىلگەن ەدىك. – قاسىمبەك مەدي ۇلى, مەم­­لەكەت باسشىسى ءماجىلىس دەپۋتاتتارىنىڭ ۇندەۋىن قول­داپ, ەلىمىزدە كەزەكتەن تىس سايلاۋ وتكىزۋ تۋرالى جارلىققا قول قوي­دى. ونى جاڭا عانا ءوزىڭىز تەلەديداردان ەستىدىڭىز. ءسىز ماجىلىسكە سايلاناتىن بولاشاق دەپۋتاتتاردان قانداي ءىس-قيمىل كۇتەسىز؟ – مەملەكەت باسشىسىنىڭ ءماجىلىس دەپۋتاتتارىنىڭ كەزەكتەن تىس سايلاۋىن وتكىزۋ تۋرالى جارلىققا قول قويۋىن ەل­­دىڭ بولاشاعىنا الاڭداعان جاناشىرلىقتان تۋعان باتىل قادام دەپ باعالايمىن. جاڭا دەپۋتاتتار ەكونومي­كا ماسەلەسىنە ەرەكشە دەن قوي­عانى ءجون دەپ سانايمىن. ءوز ويلارىن اشىق ءبىلدىرىپ, جەتەككە جۇرە بەرمەسە ەكەن دەپ ءتى­لەيمىن. بولاشاق دەپۋتاتتار ەلىمىزدى تىعىرىقتان الىپ شىعۋ جولىندا قوعامعا قوزعاۋ سالاتىن ىقپالى زور كۇش بولۋى كەرەك. جالپى, ءبىزدىڭ جەرىمىزدىڭ استى دا, ءۇستى دە بايلىققا تۇنىپ تۇر. وسىنى حالىقتىڭ يگىلىگىنە ۇقىپتى تۇردە جاراتا ءبىلۋ جولىندا دەپۋتاتتاردىڭ بەلسەن­دى ارەكەتى, تاباندى ۇستانىمى وتە ماڭىزدى ءرول اتقارادى. ءبىز شي­كىزاتقا جۇگىنە بەرمەي, ءوندىرىس سالاسىن دامىتۋعا دەن قويۋىمىز كەرەك. وزگەدەن ساتىپ الا بەرمەي, وزىمىزدە جاساپ, شىعارعانىمىز ابزال. مىنا داعدارىستىڭ ءوزى ءبىزدىڭ وسى ولقىلىعىمىزدى كوزگە شۇقىپ كورسەتتى ەمەس پە؟! – قازىرگى تاڭدا بولاشاق ءماجىلىستىڭ قۇرامىندا جاس­­­تار­دىڭ كوبىرەك بولعانى دۇرىس دەگەن پىكىرلەر بار. بۇعان ءسىز قالاي قارايسىز؟ – ماجىلىسكە جاستاردى تارتقان دۇرىس, ارينە. دەگەنمەن, ولارعا اقىل ايتىپ, ءجون سىلتەپ وتىراتىن اعا بۋىن وكىلدەرىنىڭ باسىم بولعانى ءجون. ال ەندى جاڭاشىل جاستار ومىردەن كورگەن-تۇيگەنى كوپ اعالارىنىڭ اقىلىن الىپ, ولاردىڭ باي تاجىريبەسىنە سۇيەنەر بولسا – ودان ءبىز ەش ۇتىلمايمىز. ەگەر دە شىلعي جاسقا تىزگىن بەرىپ قويار بولساق, وندا ءىسىمىز دە شيكى بولىپ شىعۋى مۇمكىن. سوندىقتان تارازىنىڭ باسىن تەڭ ۇستاۋ كەرەك. – جەرگىلىكتى ءماسليحات دە­پۋتات­­­تارىنىڭ الدىندا قانداي ءمىن­­دەتتەر تۇر دەپ ويلايسىز؟ – جەرگىلىكتى ءماسليحات دە­پۋتاتتارى حالىققا مەيلىنشە جاقىن, بىلايشا ايتقاندا, ەلدىڭ ىشىندە جۇرەدى. جۇرتتىڭ تالاپ-تىلەگىن, جوق-جىتىگىن جاقسى بىلەدى. بۇگىنگى ءماسليحات دەپۋتات­تارى اۋىلعا باسا كوڭىل ءبولۋى قاجەت دەپ ويلايمىن. نەگە دە­سەڭىز, قا­زىرگى داعدارىستىڭ قىس­­پا­عىنان اۋىل شارۋاشىلى­عىن دامىتپايىنشا شىعىن­سىز شىعا الۋىمىز ەكىتالاي. قازىرگى تاڭدا جاستار اۋىلدان قالاعا قاشىپ جاتىر. بۇل ءۇردىستى توقتاتپايىنشا بولمايدى. باياعىدا ءبىز قىزمەت ىستەپ جۇرگەندە تەرى-تەرسەك, ءجۇن-جۇر­قانىڭ باعاسى قانداي ەدى؟! قازىر وسىلار اياق استىندا ءشىرىپ جاتىر. دەپۋتاتتار وسىنى ايتىپ, ماسەلە رەتىندە كوتەرە بىلسە نۇر ۇستىنە نۇر. سول سەبەپتى دە, جەرگىلىكتى ءماسليحات دەپۋتات­تا­رى اۋىل شارۋاشىلىعىنىڭ دامۋىنا, اۋىلدىق جەرلەردەگى بيز­نەس­تىڭ ءوسىپ-وركەندەۋىنە جانىن سالىپ قىزمەت ەتۋلەرى كەرەك. سوندىقتان, ءماسليحات­تار­­­عا دا دۇرىس ادامداردىڭ كەل­گە­نىن ويلاستىرعان ءجون. – قازىرگى تاڭدا جەرگىلىكتى ءماسليحاتتاردىڭ ءرولى مەن ابى­روي-بەدەلىن كوتەرۋ ءۇشىن نە ىستەۋ كەرەك دەپ سانايسىز؟ – 2007 جىلى ءماسليحاتتاردىڭ ماسەلەسى بويىنشا ەلباسىنىڭ قابىلداۋىندا بولدىم. سوندا مەن كوپتەگەن ماسەلەلەردى كو­تەر­دىم. ماسەلەن, جەرگىلىكتى ءماسليحاتتار ءرولىنىڭ تومەندەپ, ولار تەك بيۋدجەتتى بەكىتۋمەن عانا اينالىسىپ جۇرگەنىن, وبلىستىق ءماسليحاتتار حاتشىلارىنىڭ مار­دىمسىز جالاقى الاتىنىن ايتتىم. وسى جانە باسقا دا قور­دالانىپ قالعان ماسەلەلەر توڭىرەگىندە اشىق تۇردە اڭگىمە قوزعادىم. اسىرەسە, جەرگىلىكتى وكرۋگتەردىڭ سانىن ارتتىرىپ, دەپۋتاتتاردىڭ سانىن كوبەيتۋ تۋرالى ۇسىنىسىمدى جەتكىزدىم. بۇل جونىندە كەيبىر اۋدانداعى ءماس­ليحات دەپۋتاتتارى سانىنىڭ 11-دەن اسپايتىنىن مىسال رەتىندە كەلتىردىم. ەلباسىمەن ارادا بولعان وسى اڭگىمەدەن كەيىن ءماسليحاتتاردىڭ ءرولىن كوتەرۋ بويىنشا ەداۋىر شا­رۋالار ىسكە استى. دەگەنمەن, جەرگىلىكتى ءماسليحاتتار ينستيتۋتىن دامىتۋ بويىنشا جۇمىستار جالعاسىن تابا بەرۋى كەرەك. – اڭگىمەڭىزگە راحمەت. اڭگىمەلەسكەن قايرات ءابىلدينوۆ, «ەگەمەن قازاقستان». قاراعاندى.