داريانىڭ كەمەرى تولىپ تۇر

جازداعى اپتاپ ىستىققا قاراپ قىس قىتىمىر بولاتىن شىعار دەگەن وي بولعان. تابيعاتتىڭ زاڭدىلىعى سولاي عوي. دەگەنمەن, بيىلعى قىس جازدىڭ الپەتىنە قارامادى. قازىر قىزىلورداڭىزدا كوكتەم سياقتى. اپتالاپ جاڭبىر جاۋادى. سوڭى قارعا ۇلاسادى. بىراق اياز جوق. جەر قاتپايدى. سوندىقتان, سىرداريانىڭ بەتى تولىق قاتىپ ۇلگەرگەن جوق. وعان جاڭبىر مەن قار ارالاسقاننان سوڭ, سۋدىڭ كولەمى دە ۇلعايدى. وسىعان وراي ءتيىستى مەكەمەلەر سۋ تاسقىنىنىڭ الدىن الۋ شارالارىن جۇرگىزۋدە. وبلىس ارقىلى وتەتىن سىرداريا وزەنىندەگى جاعدايعا اسا ءمان بەرىپ, كۇنى-ءتۇنى باقىلاۋدا. سىرداريا وزەنىنىڭ ارال جانە قازالى اۋداندارىنىڭ تۇسىندا كۇر (تولىق قاتپاعان مۇزدىڭ ءتۇرى) پايدا بولدى. بۇل ستراتەگيالىق نىسان سانالاتىن سىرداريانىڭ كىشى ارال تەڭىزىنە قۇيار ساعاسىنداعى «اقلاق» توسپاسىنىڭ سۋ وتكىزۋ قابىلەتىن تومەندەتىپ, بوگەتكە قاۋىپ توندىرۋدە. اتالعان بوگەت تۇسىندا 12 شاقىرىمداي جەرگە دەيىن كۇر كەپتەلىپ تۇر. ول وزەن سۋىنىڭ اعۋىنا كەدەرگى كەلتىرۋدە. «اقلاق» سۋ توسپاسى 3 سەكتسيادان تۇرادى. سونىڭ ەكەۋى وسى كۇردىڭ سالدارىنان بىتەلىپ تۇر. ءدال وسىنداي قاۋىپ «اقلاق» بوگەتىندە سوڭعى 8 جىلدان بەرى ورىن الماعان. تاعى ءبىر كەدەرگى كەلتىرىپ تۇرعانى «اقلاق» سۋ توسپاسىنىڭ تومەنگى اعىسىندا قالقىمالى كوپىر بار. بۇرىندارى جۇمىس جاساپ, كەيىن سۋدىڭ استىندا قالىپ قويعان. بۇل دا سۋدى وتكىزۋ قابىلەتىن تومەندەتىپ وتىر. وسى ماسەلەگە بايلانىستى وبلىس اكىمىنىڭ ورىنباسارى سەرىك سۇلەيمەنوۆتىڭ توراعالىعىمەن جەدەل شتاب قۇرىلىپ, قاۋىپتى سەيىلتۋ باعىتىندا جۇمىستار جۇرگىزىلدى. بۇل جۇمىستارعا بۇگىندە بارلىق جاۋاپتى سالادان 130 ادام, 19 اۋىر تەحنيكا جۇمىلدىرىلدى. سونداي-اق, كۇردى ىدىراتۋ ءۇشىن وزەننىڭ ساعالارى تازارتىلىپ, شاردارا سۋ قويماسىنان جىبەرىلەتىن سۋدىڭ كولەمى ازايتىلىپ, 9 كانالعا سۋ جىبەرىلدى. ارنايى تەحنيكالاردىڭ كومەگىمەن «اقلاق» سۋ توسپاسىنداعى بوگەتتەر 100 مەترگە دەيىن مۇزدان تازارتىلدى. بۇل جۇمىستارمەن قاتار «قاراشالاڭ» كولىنە قۇياتىن «ساعىنباي» كانالى اشىلدى. قالقىمالى كوپىر تۇسىنداعى كۇر كەپتەلىسىن جويۋ ءۇشىن ارنايى جارعىش جابدىقتارى بار بريگادا شاقىرتىلدى. كەپتەلگەن كۇردى ارال تەڭىزىنە جىلجىتۋ ماقساتىندا سىرداريا وزەنىندە مۇز جارۋ جۇمىستارى جۇرگىزىلدى. سۋ تاسقىنىن الدىن الۋ شارالارى وبلىس اكىمدىگىنىڭ قاتاڭ باقىلاۋىندا. جىل سايىن پايدا بولاتىن قاۋىپتى ايماقتاردا تۇراقتىلىقتى قامتاماسىز ەتۋ ءۇشىن ءتيىستى مەكەمەلەر بارلىق قاجەت قۇرال-جابدىقتارمەن قامتىلعان. ۇنەمى مونيتورينگ جۇرگىزىلىپ وتىراتىن 71 ۋچاسكە بار. بارلىق جاۋاپتى مەكەمەلەر قاۋىپ تونگەن جاعدايدا شۇعىل ارەكەت ەتۋگە دايىن. ەرجان بايتىلەس, «ەگەمەن قازاقستان». قىزىلوردا وبلىسى.