باس جاتتىقتىرۋشىنىڭ ەسىمى قاڭتاردىڭ سوڭىندا بەلگىلى بولادى

استانا. 15 قاڭتار. قازاقستان فۋتبول فەدەراتسياسى ۇلتتىق قۇراما باس جاتتىقتىرۋشىسىنىڭ ەسىمىن قاڭتار ايىنىڭ سوڭىندا جاريالايدى. بۇل تۋرالى اتالعان فەدەراتسيانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ەستەرىڭىزگە سالا كەتەيىك, 28 جەلتوقسان كۇنى قازاقستان ۇلتتىق قۇراماسىنىڭ باس جاتتىقتىرۋشىسىن داۋىس بەرۋ ارقىلى تاڭداۋدىڭ العاشقى كەزەڭى باستالعان بولاتىن. فەدەراتسيا تاراپىنان شەشىم قابىلداۋ ءۇشىن ساۋالناماعا 50 مىڭعا جۋىق ادام قاتىسۋى كەرەك ەدى. الايدا, ساۋالناما باستالعالى 18 كۇن وتسە دە, وعان 2600 ادام عانا قاتىسقان. ولاردىڭ 1755-ءى شەتەلدىك مامانعا داۋىس بەرسە, وتاندىق مامانداردى قولداعان جانكۇيەرلەردىڭ سانى – 845. وسىلايشا, قاتىسۋشىلاردىڭ از بولۋىنا بايلانىستى داۋىس بەرۋدىڭ ەكىنشى كەزەڭى وتكىزىلمەيدى. ناتيجەسىندە فۋتبولدان ۇلتتىق قۇرامانىڭ باس جاتتىقتىرۋشىسى وسى ايدىڭ سوڭىنا دەيىن جاريالاناتىن بولدى. ەلامان قوڭىر. دەرەك: قازاقستان فۋتبول فەدەراتسياسىنىڭ ءباسپاسوز قىزمەتى. سۋرەت: kff.kz.