اكەسىن ساتقان قىز

بۇل وقيعانىڭ شەت جاعاسىن قاراعاندى قالالىق مۇگەدەكتەر قوعامى باسقارماسىنىڭ توراعاسى مانسۇر تريگۋلوۆتان ەستىگەن ەدىك. ايتۋىن­شا اكەلى-بالالى بۇزىموۆتار اراسىن­داعى كيكىلجىڭ ءۇشىنشى جىلعا اينالىپ بارادى ەكەن. اۋەلدە قىزى وتىنىشىنە پەيىل تانىتىپ, كوزى تىرىسىندە اقىرعى جاقسىلىعىن جاساپ قالۋعا نيەتتەنگەن اكە ەندى ەرىكسىزدەن سوتقا جۇگىنۋدەن جۇيكەسى ابدەن جۇقارعان كۇيگە ءتۇسىپتى. ونسىز دا اۋرۋ-سىرقاۋلى ادامعا باسقا-باسقا, تۋعان مۇڭ­لىعىنىڭ الاياقتىق ارەكەتى جانعا باتىپ, جۇرەك تالماسىنا شالدىققان. بۇعان دەيىن ەسىك الدىنا كىرىپ-شىعىپ جۇرەتىن, كورشىلەرىمەن اڭگىمەگە ارالاساتىن اقساقال قازىر كۇرمەلگەن تىلىنەن ايىق­پاعان قالپى ازەر ءسوز قاتادى. قىزى شە؟! ەكى جىل بۇرىن جالعىزىلىكتى اكەسىنىڭ پاتەرىنە ازاماتتىق نەكەدەگى كۇيەۋى نۇر­لان سادەنوۆتى ەرتىپ كەلىپ, “بۇل پاتەر ساتىل­عان. ەرتەڭنەن باستاپ بوساتىڭىز” دەپ دۇرلىك­تىرىپ كەتكەننەن بەرى قارتتىڭ سول ءامىردى ەستى­مەگەن, ىزعارلى جۇزدەردى كورمەگەن كۇنى از. ال ءوزى كورىنبەيدى. الدەبىرەۋلەر ارقىلى ۇركىتىپ, ۇرەيلەندىرىپ مازا بەرمەيدى. سونىمەن بۇل نە جاي دەسەك, جوعارىدا اتالعانداي, قازىرگى ۋاقىتتا ازاماتتار اراسىندا ءجيى ۇشىراسۋعا اينالعان پاتەر تالاسى. تالاس بولعاندا بوتەن جاندار ەمەس, اكە مەن قىز تارتىسى. قايىر بۇزىموۆ ۇزاق جىل شاحتادا ەڭبەك ەتكەن كىسى. دەنساۋلىعىنا بايلانىستى ءىىى توپتاعى مۇگەدەكتىكپەن ەرتە زەينەتكەرلىككە شىققان. تاعدىر قايرەكەڭدى از سىناماي كەلەدى. ءوزىن قويشى, ءۇش بالاسىن تاستاپ كەتكەن ايەلىنىڭ ساتقىندىعى ءبىرىنشى سوققى بولدى. شەشە ورنىنا شەشە بولىپ ۇشەۋىن جەتىلدىردى. سولاردىڭ كىشىسى ءاليا ەدى. ەركەلىكپەن ەرتە ەسەيىپ, قۇدا ءتۇسۋسىز, ۇزاتىلۋ ىرىمىنسىز, ازاماتتىق نەكە دەگەن جولمەن بىرەۋگە جابىسقان قىزى كۇندەردىڭ كۇنىندە ءوزى تۇراتىن ەكى بولمەلى پاتەردى وسيەت ەتىپ قال­دىرۋ­عا قىڭقىلداي باستايدى. قۇلاق ەتى جەلىنە بەرگەن سوڭ اقىرىندا وتىنىشىنە اكە وزەگى جىبىمەي قال­مايدى. ءاليانىڭ كۇت­كەنى دە سول ەكەن. بۇعان دەيىن ارالاسىپ-قۇرا­لاسىپ كورمەگەن كۇيەۋ بالاسى دا ساپ ەتىپ, ەكەۋى ماپە­لەپ ماشينەگە ءمىن­گىزىپ نوتاريۋسقا الا جونە­لەدى. قالانىڭ پريشاحتينسك اتالا­تىن ءبولى­گىندە تۇراتىن قارتتى ءۇيى ىرگەسىندەگى نوتا­ريۋس­تىق كەڭسەلەردىڭ بىرىنە اپارۋعا دا بولاتىن. بىراق ولار مۇنى كەرەك قىلماي شاھار­دىڭ قيىر شەتى وڭتۇستىك-شىعىس ايما­عىنا تارتا­دى. انشەيىندە كەزەك ارىلمايتىن نوتاريۋس الدى سول كۇنى بوس بولا قالادى. قىزى مەن كۇيەۋ بالاسى دەرەۋ ىشكە ەنىپ كەتىپ, الدەندە قايتا شىعىپ “پاپا مىنا قاعازدارعا قول قويساڭىز بولدى. وسيەتىڭىز كەپىلدەن­دىرىلدى” دەپ ءالياسى كەلىپ قۇشاقتاعاندا وندا نە جازىل­عانىنا كوز جۇگىرتپەي قول قويىپ جىبەرۋى تۇبىندە پالەگە ۇرىندىراتىنىن سوندا قالاي ويلاسىن. قىزىنىڭ قۋانىشتى جۇزىنەن, “پاپالاعان” ەركە داۋسىنان ارتىق اكەگە قان­داي شاتتىق بار دەسەڭشى. ويىندا ەشتەڭە جوق , قاعاز بەتىنە قاراماي-اق قول قويعانى ەسىندە. ءاليا بۇزىموۆا قۋلىعىنىڭ بەتى ەندى اشىلىپ جاتقانداي بۇل ساتىپ الۋ شارتى بولىپ شىعادى. ول بويىنشا پاتەر 3 ميلليون 610 مىڭ تەڭگەگە ساتىلىپتى-مىس. ال ودان كەيىنگى جىلماقايلىق جىلدام. جيىرمانى جاڭا ورتالاعان ءاليانىڭ جىلپوستىقتى قاشان ۇيرەنىپ ۇلگەرگەنىن كىم ءبىلسىن, پاتەردى ىلە-شالا بۇگىن بار, ەرتەڭ جوق كۇيەۋىنىڭ شەشەسى دامەتكەن سادەنوۆاعا 1 ميلليون تەڭگەگە ساتىپ جىبەرەدى. جاڭاارقا اۋدانىنىڭ جەڭىس اۋىلىنداعى مەكتەپتە ساباق بەرەتىن ساتىپ الۋشىنىڭ كەلىنى مەن ۇلىنىڭ وسىناۋ ارەكەتتەرىنەن بەيحابار دەۋ قيىن. ناقتى يەسى سىرتىنان قاقپاقىلعا سالىن­عان پاتەردى بۇدان سوڭ د.سادەنوۆا قارىزى قاي­تارىمى ءۇشىن ك.نۇرىشەۆ دەگەن ازاماتقا اۋىس­تىرادى. بۇگىندە ول دا داۋعا ارالاسىپ جاتىر. قۇلاعى ازەر ەستيتىن, كوزى ناشار كورەتىن, ءبىر باسسا ەكى ەنتىگەتىن قارتقا ءسويتىپ اكىرەڭ­دەۋ­شىلەر كوپ. بار ءۇمىتى سوتتا. ايتكەنمەن قىزى­نىڭ الداپ قول قويدىرعانىنا سوت يلانا ما, يلانباي ما, سودان يمەنەدى. وكىنىشكە قاراي, ايعاعى نە دالەلى جوق. “قىزىم-اۋ, شىندىقتى ايتساڭشى. تورىمنەن كورىم جاقىن قالعاندا بۇل نە قورلىعىڭ. ءبارىن كەشىرەيىن تەك ينە ۇشىنا تىرەلگەن ومىرىمە تىنىش­تىق بەرشى” دەگىسى كەلسە ءالياسى تاپتىر­مايدى. نارەستە كەزىنەن باۋىرىنا باسقان اجەسى قايتىس بولعاندا كوڭىل ايتۋعا كەلىپ قالار دەگەن ويى دا ءۇزىلدى. ايتقاندايىن ءاليا بۇزىموۆانىڭ بۇل ءبىرىنشى الاياقتىعى ەمەس ەكەنى بەلگىلى بولۋدا. اكەسىن اياماعان قىز وزگەنى قايتسىن. مۇنىڭ ال­دىندا تاعى دا ءبىر تۋىسقانىن سان سوقتىرىپتى. قاراعاندى.