ەكىجاقتى ارىپتەستىككە مۇددەلىلىك

كەشە استاناعا ەكى كۇندىك سا­پار­­مەن جاپونيانىڭ سىرتقى ىستەر ءمينيسترى كاتسۋيا وكادا كەلدى. سا­پار­دىڭ العاشقى كۇنى ك. وكادا مەم­لەكەتتىك حاتشى – سىرتقى ءىس­تەر ءمينيسترى قانات ساۋداباەۆپەن كەزدەستى. باسقوسۋ كەزىندە تاراپتار ەكى ەل اراسىنداعى ساياسي, ساۋدا-ەكونومي­كالىق بايلانىستاردى اڭگىمە وزە­گىنە اينالدىردى. كەزدەسۋ كەزىندە قانات ساۋداباەۆ ناگاساكي قالاسى­نا العاشقى اتوم بومباسى تاستال­عانىنا 65 جىل تولىپ وتىرعانىن, قا­زاق جەرى دە مۇنداي قاسىرەتتەن اينالىپ وتپەگەنىن, قازاق بالاسى اتالعان زۇلماتتىڭ زاردابىن 40 جىل بويى باسىنان وتكەرگەنىن تىلگە تيەك ەتتى. “جاپونيا ءبىرىنشى كۇننەن باس­تاپ قازاقستانعا ۇلكەن قولداۋ كور­س­ەتىپ, يادرولىق سىناقتان زارداپ شەك­كەن جاندارعا كومەك قولىن سو­زىپ كەلەدى. بۇگىندە قازاقستان الەم­دى يادرولىق قارۋدان ازات ەتۋ با­عىتىندا ۇلكەن باستامالار كوتە­رۋ­دە. بۇل رەتتە مەملەكەت باسشىسى نۇر­سۇلتان نازارباەۆتىڭ باستاما­سى­­مەن 29 تامىزدىڭ “دۇنيەجۇزىلىك ياد­­­رو­لىق قارۋدان باس تارتۋ كۇنى” دەپ جا­ريالانعانىن ايتساق تا جەت­كى­لىكتى. ال يادرولىق قارۋدان باس تارتۋ – بۇل قازاقستان مەن جاپو­نيانىڭ ورتاق ۇستانىمى. بۇل رەتتە ءسىزدىڭ ساپارىڭىز قازاقستان مەن جاپونيا اراسىنداعى ارىپتەستىكتى ودان ءارى دامىتۋعا جول اشادى دەپ ويلاي­مىز”, دەدى قانات ساۋداباەۆ ءوز سوزىندە. ال جاپونيا سىرتقى ىستەر مي­نيسترى كاتسۋيا وكادا قازاقستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ 1945 جىلعى 9 تامىزدا ناگاساكي قالاسىندا ورىن العان زۇلماتتى, جاپون حالقىنىڭ باسىنان كەشكەن قاسىرەتىن ەسكە الىپ وتىرعانى ءۇشىن ريزاشىلىعىن جەتكىزدى. “وسى وراي­دا ءبىز ءوزىمىزدىڭ بارلىق كۇش-جىگە­رىمىزدى يادرولىق قارۋعا قارسى كۇرەس جۇرگىزۋگە جۇمساۋىمىز قاجەت”, دەدى ك. وكادا ءوز كەزەگىندە. سونداي-اق, ك. وكادا 15 جىل بۇ­رىن قازاقستانعا جاپونيا پار­لامەنتىنىڭ دەپۋتاتى بولىپ جۇرگەن كەزىندە ەلىمىزدىڭ سول كەزدەگى استانا­سى – الماتىعا كەلگەندىگىن, بيىل قازاق جەرىنە ەكىنشى رەت جولى ءتۇسىپ وتىرعانىن جەتكىزدى. ءلايلا ەدىلقىزى.