قاراعاندىدا پەدوفيل 1-سىنىپ وقۋشىسىن زورلاپ كەتكەن

قاراعاندى. 4 ءساۋىر. ۇستىمىزدەگى جىلعى 31 ناۋرىز كۇنى قاراعاندى قالاسىنداعى 16- شاعىن اۋداندا ءبىر پەدوفيل 1-سىنىپتا وقيتىن قىز بالاعا شابۋىل جاساپ, زورلىققا ۇقساس ارەكەتكە بارعان. بۇل تۋرالى «نوۆىي ۆەستنيك» حابارلادى. باسىلىمنىڭ بايانداۋىنشا, بەلگىسىز ءبىر جىگىت مەكتەپتەن قايتىپ كەلە جاتقان ءبىرىنشى سىنىپتا وقيتىن قىز بالانى ءۇيدىڭ پودەزىنە الداپ الىپ كىرگەن. سول جەردە قاۋقارسىز بالاعا قورلىققا ۇقساس ارەكەتتەر جاساعان. قىز بالا زورلاماقشى قاسكويدىڭ كەسكىن-كەلبەتىن پوليتسياعا ايتىپ بەردى. ول جاسى 25-30 شاماسىنداعى ەۋروپالىق ءناسىلدى جىگىت كورىنەدى. وبلىستىق ىشكى ىستەر دەپارتامەنتىنەن حابارلانعانداي, قازىرگى تاڭدا قالادا پەدوفيلدى ىزدەستىرۋ جۇمىستارى ءجۇرىپ جاتىر. «قىلمىستىق كودەكستىڭ 124-بابى بويىنشا قىلمىستىق ءىس قوزعالدى, - دەدى وبلىستىق ىشكى ىستەر دەپارتامەنتىنىڭ ءباسپاسوز حاتشىسى باقىتجان قۇدياروۆ. – كريمينالدى پوليتسيا مەن تەرگەۋ ءبولىمى قىزمەتكەرلەرىنەن تەرگەۋ-جەدەل توپ قۇرىلدى. كۇدىكتىلەردىڭ شەڭبەرى جاسالدى. ەندى وسىلاردىڭ اراسىنان ىقتيمال قىلمىسكەر ىزدەستىرىلەدى». ايقىن نەسىپباي. مانبە: نوۆىي ۆەستنيك. سۋرەت: 24KZ.