ماسكەۋدە مەكتەپ تۇلەكتەرىنە اققاينار ىشۋگە رۇقسات بەرىلەدى

استانا. 4 ءساۋىر. ماسكەۋ بيلىگى «سوڭعى قوڭىراۋدان» كەيىن مەكتەپ تۇلەكتەرى قىدىراتىن ورىنداردا الكوگول ونىمدەرىن ساتۋعا تىيىم سالۋدى جوسپارلاپ وتىر. بۇل رەتتە نەگىزىنەن قالاداعى ساياباقتار نىساناعا الىنۋدا. جەرگىلىكتى اكىمشىلىك ورىس جاستارى اراسىندا كەڭىنەن تارالعان ىشىمدىك ءىشۋ ۇردىسىمەن وسىلاي كۇرەسىپ كورمەك. بۇل تۋرالى izvestia.ru حابارلادى. ماسكەۋدىڭ قالالىق ساۋدا جانە قىزمەت كورسەتۋ دەپارتامەنتىنىڭ باسشىسى الەكسەي نەمەريۋكتىڭ ايتۋىنشا, بۇل كۇندى مەيرامحانالاردا اتاپ وتكىسى كەلگەن تۇلەكتەرگە تەك 100 گرامم اققاينار ىشۋگە رۇقسات بەرىلەدى. «وسى ماقساتتا ءبىز قالاداعى مەيرامحانالاردىڭ مازىرىمەن, مەكتەپ ديرەكتورلارى جانە اتا-انالارمەن ارنايى جۇمىس جاسايتىن بولامىز. سوندىقتان جىلداعى ءداستۇر بويىنشا تۇلەكتەر قىدىراتىن ورىنداردا ىشىمدىك ساتىلمايدى. بىراق, ءبىز قانشا تىيىم سالساق تا, تۇلەكتەر ءداستۇر بويىنشا, جوق دەگەندە, اققاينار ىشەتىنىن ءبارىمىز جاقسى بىلەمىز. سونى ەسكەرىپ, ءبىز ونىڭ مولشەرىن شەكتەپ وتىرمىز. ياعني, مەكتەپ بىتىرۋشىلەرگە اتالعان ىشىمدىكتەن تەك 100 گرامم عانا ىشۋگە رۇقسات بەرىلەدى», – دەيدى شەنەۋنىك. رەسەيدەگى مەيرامحانا جانە قوناق ءۇي قوجايىندارى فەدەراتسياسىنىڭ پرەزيدەنتى يگور بۋحاروۆ بۇل ماسەلە جونىندە: «مەيرامحانالاردا جاسوسپىرىمدەرگە سپيرتتىك ونىمدەردى تەك اتا-انالارى عانا قۇيىپ بەرەدى. كامەلەتتىك جاسقا جەتپەگەن ازاماتقا داياشىنىڭ الكوگولدىك ىشىكدىك قۇيىپ بەرۋىنە قۇقى جوق. دەسەك تە, بىزدە اتا-انالاردىڭ وزدەرى سوعان جول بەرىپ جاتادى. سوندىقتان بۇل ىستە تەك اتا-انالار جاۋاپتى», – دەدى. ال كەيبىر ساراپشىلار 100 گرامم اققاينارعا دا رۇقسات بەرمەۋ كەرەك دەپ سانايدى. سەبەبى, ولار جاسوسپىرىمدەرگە «رۇقسات» دەگەن ءسوزدىڭ ءوزى جەتىپ جاتقانىن ايتىپ وتىر. «ىشىمدىكپەن كۇرەس – رەسەيدەگى ەڭ وزەكتى ماسەلە. سوندىقتان ەندى جەتىلىپ كەلە جاتقان جاستاردىڭ ساناسىن سوعان قارسى تاربيەلەۋىمىز كەرەك. ال «رۇقسات بەرەمىز» دەپ, ونىڭ مولشەرىن كورسەتكەننەن ەشقانداي پايدا جوق. سەبەبى, جاس سانا تەك «رۇقسات» دەگەن ءسوزدى قابىلداپ, ار جاعىنداعى شەكتەۋگە نازار اۋدارمايدى», – دەيدى ماماندار. بۇگىندە رەسەيدە مەكتەپ جاسىنداعى وقۋشىلار اراسىندا ىشىمدىك ءىشۋ جىل سايىن ارتىپ وتىر. سونى ەسكەرگەن ەلدەگى قوعامدىق پالاتا ءبىلىم جانە عىلىم مينيسترلىگىنە «سوڭعى قوڭىراۋ» الدىندا مەكتەپتەردە ىشىمدىكتىڭ زيانى تۋرالى ارنايى ساباقتار وتكىزۋدى ۇسىندى. ايتا كەتەيىك, 1 مامىردان باستاپ ماسكەۋدە رەسەيلىك جاستار اراسىندا كەڭىنەن تارالعان الكوگولدىك-ەنەرگەتيكالىق ىشىمدىكتەرگە تىيىم سالىنادى. قازىر بۇل باستاماعا ماسكەۋ وبلىسى دا قوسىلعىسى كەلەتىنىن ايتۋدا. ەلامان قوڭىر. دەرەك, سۋرەت: izvestia.ru.