فورۋم جۇمىسىنا بەلسەندى قاتىسادى

قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ارنايى ۋاكىلى, پار­لامەنت سەناتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى يكرام ادىربەكوۆ ۆاتيكاننىڭ مەملەكەتتىك حاتشىسى پەترو پارولينمەن كەلىسسوز جۇرگىزدى جانە الداعى الەمدىك جانە ءداستۇرلى دىندەر كوشباسشىلارىنىڭ V سەزىنە قاتىسۋعا ريم پاپاسى فرانتسيسككە, مەملەكەتتىك حاتشى پەترو پارولينگە جانە كاردينال جان لۋي تورانعا شاقىرۋدى تابىس ەتتى. ءدىني فورۋمنىڭ 2015 جىلعى 10-11 ماۋسىمدا استانادا وتەتىنى ءمالىم. سەناتور سەزگە جان-جاقتى قولداۋ بىلدىرگەنى ءۇشىن مەملەكەتتىك حاتشى مەن ۆاتيكاننىڭ جوعارى باسشىلىعىنا ريزاشىلىق ءبىلدىردى جانە قازاقستان مەن ۆاتيكان اراسىنداعى ديپلوماتيالىق قاتىناستار ءوزارا تۇسىنىستىك پەن سەنىمگە نەگىزدەلگەن سىندارلى ءىس-قيمىلدىڭ ونەگەسى بولىپ تابىلاتىنىن اتاپ ءوتتى. «قازاقستان 100-دەن استام ۇلت پەن 17 كونفەسسيا وكىلدەرى بەيبىت جانە كەلىسىممەن ءومىر سۇرەتىن كوپۇلتتى ەل. قازاقستان حالقى اسسامبلەياسى ۇلتارالىق جانە دىنارالىق كەلىسىمدى نىعايتۋدا زور ءرول اتقارادى. قازاقستان ءۇشىن تولەرانتتىلىق قاعيداسى مەملەكەتتىك ساياساتتىڭ اجىرامايتىن بولشەگى بولىپ وتىر. وركەنيەتتەر ۇنقاتىسۋىنداعى باتىس پەن شىعىس اراسىنداعى ءوزارا ءىس-قيمىلدى نىعايتۋعا ۇمتىلىس ءبىزدى قاناتتاندىرادى», دەپ اتاپ ءوتتى ي.ادىربەكوۆ. مەملەكەتتىك حاتشى الەم­دىك جانە ءداستۇرلى دىندەر كوش­باس­شى­لارىنىڭ V سەزىنە قاتىسۋعا شاقىر­عانى ءۇشىن قازاقستان پرەزيدەنتى ن.نازار­باەۆقا العىسىن ءبىلدىردى جانە ۆاتيكان فورۋم جۇ­مى­سىنا الداعى ۋاقىتتا دا بەلسەندى قاتىساتىنىن جەتكىزدى.