ءوزارا ىقپالداستىقتى ارتتىرۋ جايى قوزعالدى

جاقىندا پارلامەنت ءماجىلىسىنىڭ دەپۋتاتى, «قازاقستان رەسپۋبليكاسى – ەۋروپالىق وداق» پارلامەنتارالىق ىنتىماقتاستىعىنىڭ مۇشەسى ايگۇل سولوۆەۆا ەۋروپا قىزمەتىنىڭ سىرتقى ءىس-ارەكەتتەر بويىنشا ورتالىق ازيا باسقارماسىنىڭ باسشىسى تويۆو كلاارمەن جانە ەۋروپالىق وداقتىڭ قازاقستانداعى وكىلدىگىنىڭ باسشىسى, ەلشى اۋرەليا بۋشەزبەن كەزدەستى. جۇزدەسۋ بارىسىندا ءماجىلىس دەپۋتاتتارى ەكى­جاقتى ىنتىماقتاستىق بايلانىستاردىڭ كوكجيەگىنىڭ كەڭەيگەنىن اتاپ ءوتتى. الدا سەرىكتەستىك قاتىناستاردىڭ قانات جايا تۇسۋىنە تىلەكتەستىك ءبىلدىرىپ, ۆيزالىق ءتارتىپ شارتتارىن جەڭىلدەتۋ جولدارىن قاراستىرۋ ماسەلەسىن قوزعادى. تويۆو كلاار قازاقستان مەن ەۋرووداق اراسىنداعى ىنتىماقتاستىق بايلانىستىڭ وتكەن جىلعى قازانداعى قازاقستان باسشىسى نۇرسۇلتان نازارباەۆتىڭ بريۋسسەلگە رەسمي ساپارىنان سوڭ جاڭا دەڭگەيگە كوتەرىلگەنىن حابارلادى. قۇرامىنا 28 مەملەكەت ەنەتىن ەۋرووداق ءوز قۇقىقتىق اكتىلەرىن قايتا قاراپ, كەلىسىمدەردە كورسەتىلەتىن جاڭا سالالارعا نازار اۋدارىپ جاتقاندىقتارىن مالىمدەدى. قازاقستانمەن ۆيزالىق ءتارتىپتى وڭتايلاندىرۋ جاعدايىن دا ويلاستىرىپ جاتقاندىقتارىن جەتكىزدى. وسى كەزدەسۋگە ءماجىلىس دەپۋتاتى, «قازاقستان رەسپۋبليكاسى – ەۋروپالىق وداق» پارلامەنتارالىق ىنتىماقتاستىعىنىڭ مۇشەسى شاۆحات وتەمىسوۆ تە قاتىستى, دەپ حابارلادى ءماجىلىستىڭ ءباسپاسوز قىزمەتى.