اقش-تا «دجەنەرال ەلەكتريك» زاۋىتى ورتكە وراندى (ۆيدەو)

استانا. 3 ءساۋىر. اقش-تىڭ كەنتۋككي شتاتىندا «دجەنەرال ەلەكتريك» (General Electric) زاۋىتىنىڭ فابريكاسى ورتكە وراندى. ءتىلسىز جاۋمەن 120 ءورت ءسوندىرۋشى كۇرەسۋدە. بۇل تۋرالى ريا «نوۆوستي» حابارلادى. دجەففەرسون وكرۋگى ءورت ءسوندىرۋ قىزمەتىنىڭ باسشىسى كەۆين تايلەردىڭ ايتۋىنشا, ازىرگە زارداپ شەككەندەر جوق. «ءورتتىڭ اۋماعى وتە ۇلكەن. سوندىقتان 18 وكرۋگتەن كەلگەن ءورت ءسوندىرۋشى بريگادا جۇمىس ىستەۋدە», – دەيدى ول. ءورت شالعان «دجەنەرال ەلەكتريك ەپلايانس» (GE Appliance) كاسىپورنى لۋيسۆيلل قالاسىندا ورنالاسقان. بۇل جەردە نەگىزىنەن تۇرمىستىق تەحنيكا, شامدار جانە ءارتۇرلى جارىق كوزدەرى جاساپ شىعارىلادى. فابريكادا 6 مىڭعا جۋىق ادام جۇمىس ىستەيدى. «ورتەنگەن عيماراتتا تەز تۇتانعىش جانە قۋاتى كۇشتى زاتتار, سونداي-اق, زياندى حيميالىق ونىمدەر جوق», – دەيدى كومپانيا وكىلى كيم فريمان. دەگەنمەن, لۋيسۆيلل تۇرعىندارى قالا اسپانىن بەلگىسىز حيميالىق ءتۇتىننىڭ تورلاپ العانىن ايتۋدا. قازىر بۇل ماسەلە الەۋمەتتىك جەلىلەردە قىزۋ تالقىلانۋدا. ءتىپتى كەيبىرەۋلەر زاۋىتتان شىققان قويۋ ءتۇتىننىڭ ادام ومىرىنە اسا قاۋىپتى ەكەنىن ايتىپ, قورعانىش بەتپەردەسىن كيىپ ءجۇرۋدى ۇسىنۋدا. ەلامان قوڭىر. دەرەك, سۋرەت: ريا «نوۆوستي».