فۋتبول. كەلەسى ماۋسىمدا وتاندىق پرەمەر-ليگادا 14 كوماندا وينايدى

استانا. 3 ءساۋىر. بۇگىن استانادا قازاقستان فۋتبول فەدەراتسياسىنىڭ كەزەكتى ءحىى كونفەرەنتسياسى ءوتتى. جيىن بارىسىندا كەلەسى ماۋسىمنان باستاپ فۋتبولدان قازاقستان پرەمەر-ليگاسىندا 14 كوماندا وينايتىنى بەلگىلى بولدى. بۇل تۋرالى egemen.kz حابارلادى. فەدەراتسيا پرەزيدەنتى ەرلان قوجاعاپانوۆ وسى ماسەلەگە ارنايى توقتالىپ: «كەلەسى ماۋسىمنان باستاپ پرەمەر-ليگا قايتادان ەكى اينالىم جۇيەسىنە كوشىپ, وندا 14 كوماندا وينايتىن بولادى. وسىعان قاتىستى اتقارۋشى كوميتەتكە ارنايى تاپسىرمالار جۇكتەلەدى», – دەدى. سونىمەن قاتار, باسقوسۋدا فۋتبول قاۋىمداستىعىنىڭ قازاقستاندىقتارعا باعىتتالعان ۇندەۋى قابىلداندى. ۇندەۋدە: «بۇگىندە ەلىمىزدە 700 مىڭنان استام ادام, ونىڭ ىشىندە 386 مىڭ بالا تۇراقتى تۇردە فۋتبولمەن اينالىسادى. ءتورت ميلليوننان استام ادام بوس ۋاقىتىن سپورتقا ارنايدى. بۇل كورسەتكىش جىلدان جىلعا ارتىپ كەلەدى. قازاقستاندا فۋتبول ينفراقۇرىلىمى سالىنىپ, فۋتبول الاڭدارى اشىلدى. ستاديوندار مەن سپورتتىق-ساۋىقتىرۋ كەشەندەرى سالىنۋدا», – دەلىنگەن. كونفەرەنتسياعا قاتىسۋشىلار وتاندىق سپورتتىڭ ەلباسىنىڭ تىكەلەي قولداۋىمەن دامىپ وتىرعانىن ايتتى. ەلامان قوڭىر. دەرەك: egemen.kz. سۋرەت: prosportkz.kz.