اقش-تا جازىقسىز 30 جىل تۇرمەدە وتىرعان ازامات بوستاندىققا شىقتى

استانا. 3 ءساۋىر. اقش-تىڭ الاباما شتاتىندا ادام ءولتىردى دەگەن ايىپپەن سوڭعى 30 جىلىن تۇرمەدە وتكىزگەن ازاماتتىڭ كىناسىز ەكەنى دالەلدەنىپ, بوستاندىققا شىقتى. بۇل تۋرالى ريا «نوۆوستي» حابارلادى. ەنتوني رەي حينتون ەسىمدى امەريكالىق 1985 جىلى قاماۋعا الىنعان. وعان الاباماداعى رەستورانداردىڭ ءبىرىن توناۋ كەزىندە ەكى ادامدى ءولتىردى دەگەن ايىپ تاعىلعان. ءتىپتى, سوت ونى ءولىم جازاسىنا كەسكەن ەكەن. بۇگىنگە دەيىن ول جازانىڭ ورىندالۋىن كۇتىپ وتىرعان. تاياۋدا سوت-مەديتسينالىق ساراپتاماسى حينتوننان تابىلعان تاپانشانىڭ وعان تاعىلعان ايىپقا ەشقانداي قاتىسى جوعىن انىقتادى. ادۆوكات برايان ستيۆەنسوننىڭ ايتۋىنشا, حينتوننىڭ كىناسى سول كەزدە-اق دالەلدەنبەگەن. «ونىڭ بار ايىبى - افروامەريكالىق بولۋى. سول سەبەپتى ول كەزدە بۇل ءىستىڭ بايىبىنا بارماستان, ەڭ اۋىر جازا تاعايىندالدى», – دەيدى ستيۆەنسون. ساراپتاما ناتيجەسىنە بايلانىستى ءىس قايتا قارالىپ, سوت لاۋرا پەترو جاڭا ۇكىم شىعاردى. سوعان سايكەس, حينتونعا تاعىلعان بارلىق ايىپ نەگىزسىز دەپ تانىلىپ, ول بوستاندىققا شىقتى. ەلامان قوڭىر. دەرەك, سۋرەت: ريا «نوۆوستي».