شىعىستا «OSKEMEN EXPO -2015» كورمەسى باستالدى

وسكەمەن. 21 مامىر. شىعىس قازاقستان وبلىسىندا «وسكەمەن ەكسپو-2015» كورمەسى باستالدى. بۇل تۋرالى egemen.kz ءتىلشىسى حابارلادى. اتالعان كورمە 10 شەت مەملەكەتتەن كەلگەن مەيماندارعا قازاقستاننىڭ ەنەرگيانىڭ بالامالى كوزدەرى مەن رەسۋرستاردى ۇنەمدەۋدەگى عىلىمي-تەحنيكالىق جەتىستىكتەرى مەن الەۋەتىن كورسەتەدى. بايقاۋ قورتىندىسى بويىنشا ۇزدىك جوبا استانا قالاسىندا وتەتىن «ەكسپو-2017» حالىقارالىق كورمەسىنە قاتىساتىن بولادى. بيىل ەكىنشى مارتە ۇيىمداستىرىلىپ وتىرعان حالىقارالىق كورمەگە رەسەي, ۇلىبريتانيا, قىتاي, وار, اقش, جاپونيا, كورەيا, پولشا ەلدەرىنىڭ جەتەكشى عالىمدارى قاتىسىپ, قازاقستاندىق ونەرتاپقىشتاردىڭ يدەيالارىمەن تانىسادى. ولاردىڭ اراسىندا وسكەمەن, سەمەي, اتىراۋ, پاۆلودار, قىزىلوردا جانە قاراعاندى قالالارىنان كەلگەن عىلىم دوكتورلارى مەن كانديداتتارى, ونەرتاپقىش عالىمدار, ستۋدەنتتەر بار. «كەلەشەكتىڭ ەنەرگياسى» جوبالار بايقاۋىنىڭ بيىلعى ەرەكشەلىگى –«OSKEMEN EXPO Junior-2015» اتتى كوللەدج ستۋدەنتتەرى مەن وقۋشىلار سەكتسياسىنىڭ اشىلۋى دەۋگە بولادى. ولار كورمەدە ءوز جۇمىستارىن كورسەتىپ قانا قويماي, «جاسىل» تەحنولوگيا سالاسىنداعى بىلىمدەرىن جەتىلدىرىپ, ۋاقىتتارىن ءتيىمدى پايدالانۋدى ۇيرەنەتىن بولادى. شىعىس قازاقستان ەلىمىزدە يننوۆاتسيالىق دامۋ جاعىنان جەتەكشى وڭىرلەردىڭ بىرىنە سانالادى. سوڭعى ءۇش جىلدا وبلىس كولەمىندە اتالعان سالاداعى بەلسەندى كاسىپورىنداردىڭ سانى 100-دەن اسىپ, ءبىر جارىم ەسەگە ءوستى. «كەلەشەكتىڭ ەنەرگياسى» بايقاۋىنا 4 اتالىم بويىنشا 44 ءوتىنىش قابىلداندى. اتاپ ايتقاندا, ۇسىنىلعان جوبالار «ءداستۇرلى ەنەرگەتيكاداعى تازا تەحنولوگيالار», «تاۋ-كەن جانە مەتاللۋرگيالىق سالاداعى «جاسىل» تەحنولوگيالار», «وڭىردەگى ءتۋريزمنىڭ تۇراقتى دامۋى. ەكوتۋريزم» جانە «Junior – 2015» اتالىمدارى بويىنشا سىنعا تۇسەدى. دۋمان اناش. دەرەك, سۋرەت: egemen.kz.