باس پروكۋراتۋرادا كونستيتۋتسيانىڭ 20 جىلدىعىنا ارنالعان ءىس-شارا وتكىزىلدى

استانا. 25 تامىز. بۇگىن باس پروكۋراتۋرادا كونستيتۋتسيانىڭ 20 جىلدىعىن مەرەكەلەۋگە ارنالعان سالتاناتتى جينالىس بولىپ ءوتتى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. باس پروكۋرور اسحات داۋىلباەۆ ارىپتەستەرىن كونستيتۋتسيا كۇنىمەن قۇتتىقتاي وتىرىپ, اتا زاڭنىڭ تاۋەلسىز قازاقستاننىڭ قالىپتاسۋى جولىنداعى تاريحي ءمانىن, ەلىمىزدەگى اسا ماڭىزدى الەۋمەتتىك-ەكونوميكالىق جانە ساياسي رەفورمالاردىڭ ناتيجەلەرىن, كونستيتۋتسيالىق زاڭدىلىقتى جانە قۇقىقتىق ءتارتىپتى قامتاماسىز ەتۋدەگى پروكۋراتۋرانىڭ ءرولىن اتاپ ءوتتى. مەملەكەت باسشىسىنىڭ كورەگەن ساياساتىنىڭ ناتيجەسىندە قازاقستان تاۋەلسىزدىك العاننان بەرى تەرەڭ الەۋمەتتىك-ەكونوميكالىق جانە ساياسي وزگەرىستەردى قامتىعان ۇلكەن جولدى ءجۇرىپ ءوتتى. قازىرگى قازاقستاننىڭ تاريحىنداعى وتكەن جيىرما جىل اتا زاڭ مەن ەلىمىزدىڭ زاڭدارىنىڭ ۇستەمدىگىن قامتاماسىز ەتۋ جونىندەگى ستراتەگيالىق مىندەتتەردى جۇزەگە اسىرۋ ۋاقىتى بولدى. وسى تۇرعىدان العاندا كونستيتۋتسيالىق زاڭدىلىقتى نىعايتۋ, مەملەكەتتىڭ تۇراقتى دامۋى ءۇشىن قاجەتتى جاعدايلاردى جاساۋ, ىشكى ساياسي تۇراقتىلىقتى جانە قوعامنىڭ بىرلىگىن ساقتاۋعا ەرەكشە كوڭىل ءبولىندى. وسى مىندەتتەردى ورىنداۋدا مەملەكەت اتىنان زاڭداردىڭ ناقتى جانە دالمە-ءدال قولدانىلۋىن جوعارى قاداعالاۋدى, كونستيتۋتسياعا قايشى كەلەتىن نورماتيۆتىك قۇقىقتىق اكتىلەردى انىقتاۋدى جۇزەگە اسىراتىن پروكۋراتۋرا ورگاندارىنا ەرەكشە ءرول بەرىلگەن. باس پروكۋرور سالتاناتتى جاعدايدا مەملەكەت باسشىسىنىڭ جارلىعىمەن ناگرادتالعان پروكۋراتۋرا ورگاندارىنىڭ ارداگەرلەرى مەن قىزمەتكەرلەرىنە «قازاقستان كونستيتۋتسياسىنا 20 جىل» مەرەيتويلىق مەدالىن تاپسىردى. وسى مەرەكە قارساڭىندا پروكۋرورلاردىڭ اراسىندا كونستيتۋتسيانىڭ مەرەيتويىنا ارنالعان ۇزدىك تاقىرىپتىق جۇمىستاردىڭ بايقاۋى وتكىزىلگەن بولاتىن. كونكۋرس جەڭىمپازدارى ۆەدومستۆولىق ناگرادالارمەن جانە باس پروكۋروردىڭ العىس حاتتارىمەن اتالىپ ءوتىلدى. سونداي-اق, سالتاناتتى جينالىسقا قاتىسقان قازاقستان زاڭگەرلەر وداعىنىڭ توراعاسى, پارلامەنت ءماجىلىسىنىڭ زاڭناما جانە سوت-قۇقىقتىق رەفورمالار جونىندەگى كوميتەتىنىڭ توراعاسى راحمەت مۇقاشەۆ باس پروكۋراتۋرانىڭ باسشىلارىنا «قازاقستاننىڭ قۇرمەتتى زاڭگەرى» توسبەلگىسىن تابىس ەتتى. باس پروكۋرور ناگرادا يەگەرلەرىن قۇتتىقتاپ, ولاردىڭ بارلىعىنا ەلىمىزدەگى زاڭدىلىقتى جانە قۇقىقتىق ءتارتىپتى قامتاماسىز ەتۋ جونىندەگى جاۋاپتى مىندەتتەردى ورىنداۋدا ودان ءارى جەتىستىكتەر تىلەدى. ەلامان قوڭىر. دەرەك: باس پروكۋراتۋرانىڭ ءباسپاسوز قىزمەتى. سۋرەت: egemen.kz.