بۇگىن «بارىس» قۇرلىقتىق حوككەي ليگاسىنداعى جاڭا ماۋسىمىن باستايدى

استانا. 25 تامىز. بۇگىن استانانىڭ «بارىس» حوككەي كومانداسى قۇرلىقتىق حوككەي ليگاسىنىڭ بيىلعى ماۋسىمىنداعى العاشقى ويىنىن وتكىزەدى. ماۋسىمدى ءوز ايدىنىندا باستايتىن «بارىس» ماگنيتوگورسكىنىڭ «مەتاللۋرگ» كلۋبىن قابىلدايدى. بۇل تۋرالى egemen.kz حابارلادى. كەزدەسۋ ەلورداداعى «قازاقستان» سپورت كەشەنىندە وتەدى. جەرگىلىكتى ۋاقىتپەن ساعات 19:30-دا باستالاتىن ويىندى KazSport تەلەارناسى تىكەلەي ەفيردە كورسەتۋدى كوزدەپ وتىر. اراعا ەكى كۇن سالىپ ەرلان ساعىمباەۆ جاتتىقتىراتىن كوماندا ۋفانىڭ «سالاۆات يۋلاەۆ» كومانداسىمەن كۇش سىناسادى. ول كەزدەسۋدى دە استانالىقتار ءوز ايدىنىندا وتكىزەدى. وسى رەتتە ايتا كەتەر جايت, بيىل استانادا كوپ فۋنكتسيونالدى جاڭا مۇز سارايىنىڭ پايدالانۋعا بەرىلگەنى بەلگىلى. 12 مىڭ ورىندىق سپورت كەشەنىندە «بارىس» قۇرلىقتىق حوككەي ليگاسى شەڭبەرىندە ءوز ايدىنىنداعى كەزدەسۋلەرىن وتكىزەدى. الايدا, 11 قىركۇيەكتە قازاق حاندىعىنىڭ 550 جىلدىعىنا بايلانىستى اتالعان جاڭا عيماراتتا تەاترلاندىرىلعان قويىلىم ۇيىمداستىرىلادى. سوعان دايىندىق جۇمىستارىنىڭ جۇرگىزىلۋىنە بايلانىستى «بارىس» ماۋسىمدى بۇرىنعى ايدىنىندا باستايتىن بولدى. اتاپ ايتقاندا, «مەتاللۋرگ» پەن «سالاۆات يۋلاەۆتان» بولەك, «لوكوموتيۆ» (6 قىركۇيەك), «لادا» (8 قىركۇيەك), «اك بارس» (10 قىركۇيەك) جانە «سوچي» (10 قىركۇيەك) كوماندالارىن «قازاقستان» سپورت كەشەنىندە قابىلدايدى. ال ودان كەيىنگى ماتچتار جاڭا ايدىندا وتەدى. «بارىس» ءۇشىن بۇل وسى ليگاداعى 8-ماۋسىم. العاش رەت تۋرنيرگە 2008-2009 جىلعى ماۋسىمدا قاتىسقان كوماندانىڭ ەڭ جوعارى ناتيجەسى 2013-2014 جىلعى ماۋسىمدا تىركەلدى. سول كەزدە «بارىس» قۇرلىقتىق حوككەي ليگاسى پلەي-وفف باسەكەسىنىڭ ەكىنشى راۋندىنا دەيىن جەتكەن بولاتىن. ال قالعان ماۋسىمداردىڭ بارلىعىندا پلەي-وفف ساتىسىنىڭ ءبىرىنشى اينالىمىنان اسا الماي كەلەدى. ەلامان قوڭىر. دەرەك: egemen.kz. سۋرەت: vk.com.