تۇركىستاندا ءستاليننىڭ ەسكەرتكىشى الىنىپ تاستالدى

شىمكەنت. 17 مامىر. بۇرناعى كۇنى وڭتۇستىك قازاقستان وبلىسى, تۇركىستان قالاسى ماڭىنداعى ەسكى يقان اۋىلىنداعى جەكەمەنشىك ءۇيدىڭ الدىندا ورناتىلعان ءستاليننىڭ ەسكەرتكىشى الىنىپ تاستالدى. بۇل تۋرالى ەسكى يقان اۋىلدىق وكرۋگىنىڭ اكىمى ابدۋللا سايديكراموۆتىڭ سوزىنە سىلتەمە جاساعان egemen.kz ءتىلشىسى حابارلادى. ەسكەرتكىشتىڭ بۇزىلۋ پروتسەسى 15 مامىر كۇنى جۇرگىزىلگەن. اۋىل اكىمىنىڭ ايتۋىنشا, جۇمىس تۇسكى ساعات 12-لەر شاماسىندا قولعا الىنىپ, جەكەمەنشىك ءۇيدىڭ اۋلاسىندا ورناتىلعان ستالين ەسكەرتكىشى زاڭسىز بولعان سوڭ الىنىپ تاستالعان. سەبەبى, ەسكەرتكىشتى اۋلاسىنا قويىپ العان اۋىل تۇرعىنى بۇعان قازاقستان رەسپۋبليكاسى مادەنيەت جانە سپورت مينيسترلىگىنەن رۇقسات الماعان. «بۇگىن ءستاليننىڭ ەسكەرتكىشىن الىپ تاستادىق. تۇرعىن ەسكەرتكىشتى الىپ تاستاۋعا كەلىستى. ويتكەنى, جەرى زاڭسىز, نىسانالى ماقساتى دۇرىس ەمەس», - دەيدى اكىم. ءۇي مەن جەردىڭ ەگەسى كەنتتە تۋعالى بەرى تۇرىپ كەلە جاتىر ەكەن. بىراق سوڭعى ۋاقىتتارى مەنشىگىن قايتا تىركەۋدەن وتكىزبەگەن. اۋىل تۇرعىندارى ەسكەرتكىشتى تۇعىرىنان وزدەرى ءبولىپ, بۇزىپ الىپ شىققان. ولار مونۋمەنتتى ءۇش بولىككە ءبولىپ العان. ەسكى يقانداعى ەسكەرتكىشتى الۋ جونىندەگى باستاماشىل توپتىڭ جەتەكشىسى مۋرات يۋلداشەۆ مۇنىڭ ءبارى كەنت جانە اۋدان باسشىلىعىمەن بەلگىلى ءبىر دارەجەدە كەلەسىمگە كەلۋدىڭ ارقاسىندا وسىعان قول جەتكىزىلگەنىن ايتتى. «ءۇيدىڭ يەسى – باقىت اعانىڭ ءوز مەنشىگىندەگى جەرى جونىندەگى قۇجاتتارىنىڭ ءبارى دۇرىس, تەك سوڭعى مەملەكەتتىك اكت ۇلگىسىندە قايتا تىركەۋدەن وتپەگەن ەكەن. ونى دايىنداۋعا ءبىر جارىم, ەكى ايداي ۋاقىت كەتەدى. سودان كەيىن ول, البەتتە, ەسكەرتكىشتى ورنىنا قايتا قويا الادى. بىراق وسىنداي ەسكەرتكىشتەردى زەرتتەپ كورمەگەن ءبىزدىڭ دە كىنامىز بار, الداعى ۋاقىتتا بارىنشا ساق بولامىز», - دەدى ول. تۇركىستان اۋدانىنىڭ ەسكى يقان اۋىلىندا بولعان ستالين ەسكەرتكىشىن دەمونتاج جاساۋ, ياعني بۇزىپ تاستاۋ وقيعاسى قازاقستان اۋماعى عانا ەمەس, سونىمەن قاتار ودان تىسقارى جەرلەردە دە ۇلكەن قوزعالىس تۋعىزدى. بيىكتىگى ءۇش مەترگە جەتەتىن ستالين ەسكەرتكىشى – قازاقستانداعى مۇنداي جالعىز مونۋمەنت. جالپى, قازىر كۇللى الەمدە يوسيف دجۋگاشۆيليگە ورناتىلعان وسىنداي بەس ەسكەرتكىش قانا بار ەكەن. ەستەرىڭىزگە سالا كەتەيىك, ەسكى يقاندا الپىس جىلدان بەرى تۇرىپ تۇرعان بۇل ەسكەرتكىش 2006 جىلى قاتتى داۋىلدان كەيىن قۇلاپ, سول ۋاقىتتان بەرى ەلەۋسىز جاتقان. وعان دەيىن 60 جىل تۇرعان ەسكەرتكىشتى تاياۋدا اۋىل اقساقالدارى ءوز قاراجاتى ەسەبىنەن جوندەپ, قايتا كوتەرىپ قويعان بولاتىن. باقتيار تايجان. دەرەك: egemen.kz. سۋرەت: otyrar.kz.