كوللاجدى جاساعان زاۋرەش سماعۇل, «EQ»
ءمينيستردىڭ ايتۋىنشا, ادامي كاپيتالعا ينۆەستيتسيا جاساۋ – مەملەكەتتىك ساياساتتىڭ باستى باسىمدىقتارىنىڭ ءبىرى. بۇل باعىت قاسىم-جومارت توقاەۆ جۇرگىزىپ وتىرعان رەفورمالاردىڭ نەگىزىن قۇرايدى. بۇگىندە الەم ەلدەرى ءبىلىم بەرۋ جۇيەسىن جاڭعىرتىپ, جاڭا مودەلدەر مەن تسيفرلىق شەشىمدەردى ەنگىزىپ جاتىر.
«قازىرگى تاڭدا ءبىلىم بەرۋ سالاسى تەك ءبىلىم بەرۋمەن شەكتەلمەي, ناقتى داعدىلاردى مەڭگەرگەن, ەڭبەك نارىعىنا بەيىمدەلگەن مامانداردى دايارلاۋعا باعىتتالۋى ءتيىس. بۇل – ساپالى جاڭا كەزەڭگە كوشۋ», دەدى ايدا بالاەۆا.
وسىعان بايلانىستى تالاپكەرلەردى ىرىكتەۋ جۇيەسىندە, اسىرەسە پەداگوگيكالىق ماماندىقتارعا قابىلداۋ كەزىندە جاڭا تاسىلدەر ەنگىزىلمەك. اتاپ ايتقاندا, تەستىلەۋمەن قاتار ارنايى ەمتيحانداردى قامتيتىن گيبريدتى باعالاۋ فورماسى قولدانىلادى. بۇل ءتاسىل تالاپكەرلەردىڭ تەك پاندىك ءبىلىمىن عانا ەمەس, سونىمەن بىرگە سىني ويلاۋ, تالداۋ جانە كوممۋنيكاتسيالىق داعدىلارىن باعالاۋعا مۇمكىندىك بەرەدى.
سونىمەن قاتار, كەلەسى جىلدان باستاپ پەداگوگيكالىق باعىتتارعا ءتۇسۋ كەزىندە ۇبت ناتيجەلەرىمەن قاتار اۋىزشا ەمتيحاندار دا ەسكەرىلمەك. بۇل ەمتيحانداردا تالاپكەرلەردىڭ وقۋعا دايىندىعى مەن كاسىبي بەيىمدىلىگىنە ەرەكشە نازار اۋدارىلادى.
مينيستر سونداي-اق ۇبت-نى ءبىر رەت تاپسىرۋ فورماتىنا كوشىرۋ ۇسىنىلىپ وتىرعانىن اتاپ ءوتتى. ونىڭ سوزىنشە, بۇل شەشىم گرانت كونكۋرسىنا قاتىسۋ كەزىندە ءادىل ءارى وبەكتيۆتى باعالاۋدى قامتاماسىز ەتۋگە باعىتتالعان. ال تالاپكەرلەردىڭ دايىندىق دەڭگەيىن تەكسەرۋ ءۇشىن سىناق تەستىلەۋ جۇيەسى ساقتالادى.
بۇدان بولەك, جوعارى وقۋ ورىندارىنا Foundation باعدارلامالارى ارقىلى شارتتى قابىلداۋ تاجىريبەسىنەن باس تارتۋ جوسپارلانىپ وتىر. سەبەبى مۇنداي جۇيەمەن قابىلدانعان ستۋدەنتتەردىڭ ەداۋىر بولىگى وقۋ بارىسىندا قاجەتتى شەكتى بالدى جيناي المايدى.
«ۇبت جۇيەسىن وزگەرتۋ – تەستىلەۋدەن باس تارتۋ ەمەس. بۇل – دارىندى تالاپكەرلەردى انىقتاپ, ءادىل ىرىكتەۋگە باعىتتالعان ماڭىزدى قادام», دەپ قورىتىندىلادى ايدا بالاەۆا.
جالپى, ۇسىنىلىپ وتىرعان وزگەرىستەر ءبىلىم بەرۋ ساپاسىن ارتتىرىپ, ەلدىڭ ۇزاق مەرزىمدى دامۋىنا نەگىز بولادى دەپ كۇتىلىپ وتىر.
