ماسەلەن, 320 مىڭ تۇرعىنى بار شاھاردى جىلۋمەن قامتاماسىز ەتۋ ماقساتىندا جاڭا جىلۋ ەلەكتر ورتالىعى سالىنىپ جاتىر. نىساننىڭ قۇرىلىس بارىسىمەن اباي وبلىسىنا جۇمىس ساپارىمەن بارعان «سامۇرىق-قازىنا» اق باسشىسى نۇرلان جاقىپوۆ پەن وبلىس اكىمى بەرىك ءۋالي تانىستى.
جوباعا سايكەس سەمەي قالاسىنىڭ سول جاعالاۋىندا ورنالاسقان ءۇشىنشى جىلۋ ەلەكتر ورتالىعىنىڭ بەلگىلەنگەن ەلەكتر قۋاتى 405 مۆت, جىلۋ قۋاتى – 1000 گكال/ساع. بولماقشى. بۇل كورسەتكىشتەر قالا قاجەتتىلىگىن تولىق وتەپ, ءوڭىردىڭ ەنەرگەتيكا جۇيەسىنىڭ تۇراقتىلىعىن ارتتىرۋعا سەپتىگىن تيگىزەدى.
ساپار بارىسىندا قور باسشىسى «سامۇرىق-ەنەرگو» كومپانياسىنىڭ باسشىلىعىمەن, مەردىگەرلەرمەن كەزدەسىپ, جوبانى ىسكە اسىرۋ قارقىنىن, جۇمىستىڭ قازىرگى جاي-كۇيىن تالقىلادى. اسىرەسە قۇرىلىس مەرزىمىن ساقتاۋ, قۇرىلىس بارىسىن ءتيىمدى ۇيىمداستىرۋ ماسەلەلەرىنە ەرەكشە نازار اۋدارىلدى.
اتالعان نىساندى 2029 جىلى ىسكە قوسۋ جوسپارلانعان. كەزدەسۋ قورىتىندىسىندا جۇمىستىڭ تۇرالاپ قالۋىنا جول بەرمەي, جوبانى مەجەلى مەرزىمدە اياقتاۋ قاجەتتىگى ايتىلدى. سونىمەن قاتار قۇرىلىس قارقىنىن جەدەلدەتۋگە بارلىق قاجەتتى شارانى قابىلداۋ كەرەكتىگى ەسكەرتىلدى.
جاڭا جىلۋ ەلەكتر ورتالىعىنىڭ ىسكە قوسىلۋى وڭىردەگى ەكولوگيالىق جاعدايعا دا وڭ اسەر ەتەدى. جوبا اياسىندا «تازا كومىر» تەحنولوگيالارى مەن زاماناۋي گاز تازارتۋ جۇيەلەرىن قولدانۋ كوزدەلگەن. بۇل قازىرگى كومىرمەن جۇمىس ىستەيتىن ەنەرگيا كوزىمەن سالىستىرعاندا زياندى شىعارىندىنى ايتارلىقتاي ازايتادى.
سونداي-اق وسى كۇنى سەمەي قالاسىنىڭ بەيبىتشىلىك ارالىنداعى ورمان القابىندا «سامۇرىق-قازىنا» قورى اباي وبلىسى اكىمدىگىمەن بىرلەسىپ ەكولوگيالىق اكتسيا وتكىزدى. ءىس-شارا مەملەكەت باسشىسى قاسىم-جومارت توقاەۆتىڭ «تازا قازاقستان» باستاماسى اياسىندا ۇيىمداستىرىلدى.
ناۋقان اياسىندا جاس كوشەتتەر وتىرعىزىلدى. جالپى, كەيىنگى ەكى جىلدا «سامۇرىق-قازىنا» توبى ەل كولەمىندە 5,8 ملن ءتۇپ اعاش ەككەن. قور وكىلدەرىنىڭ ايتۋىنشا, بۇل باعىتتاعى جۇمىس جۇيەلى تۇردە جالعاسادى.
«بيىل «سامۇرىق-قازىنا» كومپانيالارى 5 ميلليوننان استام تال ەگۋدى جوسپارلاپ وتىر. بۇل – جاي عانا اكتسيا ەمەس, كۇندەلىكتى ومىرلىك فيلوسوفيامىزدىڭ ءبىر بولىگى. «تازا قازاقستان» – نەگىزگى قۇندىلىقتارىمىزدىڭ ءبىرى», دەدى قور باسشىسى نۇرلان جاقىپوۆ.
ۇلتتىق ءال-اۋقات قورى ءوڭىردىڭ الەۋمەتتىك ينفراقۇرىلىمىن دامىتۋعا دا اتسالىسىپ كەلەدى. وسى ورايدا «سامۇرىق-قازىنا» قولداۋىمەن سەمەي قالاسىندا زاماناۋي دەنە شىنىقتىرۋ-ساۋىقتىرۋ كەشەنى سالىنباقشى. قور باسشىسى نۇرلان جاقىپوۆ پەن وبلىس اكىمى بەرىك ءۋالي نىساننىڭ ىرگەتاسىن قالاۋ راسىمىنە قاتىسىپ, قۇرىلىستىڭ باستالۋىن بىلدىرەتىن كاپسۋلانى سالدى. جالپى اۋدانى شامامەن 2 مىڭ شارشى مەتر بولاتىن ەكى قاباتتى كەشەندە ءارتۇرلى سپورت تۇرىنە ارنالعان زالدار, 100 كورەرمەنگە ارنالعان تريبۋنا, جاتتىعۋ زالى, وزگە دە قاجەتتى بولىمدەر قاراستىرىلعان. جوبانى ىسكە اسىرۋعا شامامەن 1,6 ملرد تەڭگە باعىتتالادى.
بۇگىندە «سامۇرىق-قازىنا» قورىنىڭ قولداۋىمەن ەلىمىزدە 19 ءىرى سپورت نىسانى جۇمىس ىستەيدى. بۇل كەشەندەردە 700 مىڭنان استام ادام سپورتپەن اينالىسادى. بيىل ءدال وسىنداي نىساندار اقتوبە, ارقالىق, قوناەۆ قالالارىندا دا سالىنادى.
جالپى, كەيىنگى 8 جىلدا اباي وبلىسىندا قوردىڭ قولداۋىمەن 19 الەۋمەتتىك جوبا جۇزەگە اسىرىلعان. ولاردىڭ ىشىندە بالالارعا ارنالعان 2 وڭالتۋ ورتالىعى, ينكليۋزيانى قولداۋ كابينەتتەرى, زاعيپ جاندارعا ارنالعان ارنايى كىتاپحانا, سپورت الاڭدارى, وزگە دە نىساندار بار.
«سەمەيدەگى جاڭا كەشەن بولاشاق چەمپيونداردى تاربيەلەپ, وڭىردەگى بۇقارالىق سپورتتىڭ دامۋىنا سەرپىن بەرەدى دەپ سەنەمىن», دەدى نۇرلان جاقىپوۆ سالتاناتتى راسىمدە.
«سامۇرىق-قازىنا» قورىنىڭ باستامالارى اباي وبلىسىنىڭ الەۋمەتتىك-ەكونوميكالىق دامۋىنا تىڭ سەرپىن بەرىپ, تۇرعىنداردىڭ ءومىر ساپاسىن ارتتىرۋعا باعىتتالعان. قور توبى جۇيەلى جۇمىستى ءارى قاراي دا جالعاستىرىپ, وزگە وڭىرلەردە دە ەل يگىلىگىنە ارنالعان جوبالاردىڭ سانىن ارتتىرۋدى كوزدەپ وتىر.
جانسايا قاپاسقىزى
