فوتو: اشىق دەرەككوز
ەڭبەك جانە حالىقتى الەۋمەتتىك قورعاۋ مينيسترلىگى ازاماتتارعا اتاۋلى كومەك كورسەتۋدى كۇشەيتۋ ماقساتىندا وڭىرلىك مانساپ ورتالىقتارىنىڭ جۇمىسىن جەتىلدىرىپ جاتىر. مينيستر اسقاربەك ەرتاەۆتىڭ توراعالىعىمەن وتكەن جۇمىس كەڭەسىندە جاڭا الگوريتم تانىستىرىلىپ, باستى نازار «باسىم توپقا» – ءوز بەتىنشە جۇمىسقا ورنالاسۋى قيىن ۇمىتكەرلەرگە اۋدارىلدى.
ەڭبەك نارىعىن كەشەندى تالداۋ ناتيجەسىندە 93,5 مىڭ ادامنان تۇراتىن نىسانالى توپ ايقىندالدى. بۇل ساناتقا الەۋمەتتىك جاعدايى تومەن ازاماتتار, ەڭبەك تاجىريبەسى جوق نەمەسە جۇمىس وتىلىندە 6 ايدان استام ءۇزىلىسى بار ادامدار, سونداي-اق ورتا جانە تەحنيكالىق-كاسىپتىك ءبىلىمى بار ۇمىتكەرلەر ەنگىزىلدى. ال جوعارى ءبىلىمى نەمەسە جۋىرداعى جۇمىس تاجىريبەسى بار ازاماتتار بۇل تىزىمنەن شىعارىلىپ, قولداۋ ەڭ مۇقتاج توپتارعا باعىتتالدى.
ەندى وسى باسىم توپ ءۇشىن جەكە سۇيەمەلدەۋ جۇيەسى قالىپتاستىرىلادى. ءاربىر ازاماتتى جۇمىسپەن قامتۋ ۇدەرىسىن ناقتى باقىلاۋ ءۇشىن مينيسترلىك اقپاراتتىق جۇيەگە جاڭا تسيفرلىق قۇرالدار ەنگىزدى. مانساپ ورتالىقتارى ارنايى پانەل ارقىلى ۇمىتكەرلەردى ناقتى ۋاقىت رەجيمىندە اتى-ءجونى بويىنشا باقىلاپ, كورسەتىلگەن قولداۋ شارالارىن كۇندەلىكتى قاداعالاي الادى.
ەڭبەك نارىعىنىڭ ەرەكشە بۋىنى: ءوزىن-ءوزى جۇمىسپەن قامتۋ زامان تالابى ما, الدە امالسىزدىق پا؟
سونىمەن قاتار مونيتورينگ ناتيجەلەرى وڭىرلەردەگى جۇمىس قارقىنىن كۇشەيتۋ قاجەتتىگىن كورسەتتى. قازىرگى تاڭدا نىسانالى توپتاعى بار بولعانى 39,8 مىڭ ادام عانا جۇمىسپەن قامتۋ شارالارىمەن قامتىلعان.
وسىعان بايلانىستى مينيستر وڭىرلىك مانساپ ورتالىقتارىنا ناقتى مىندەت جۇكتەدى. اتاپ ايتقاندا, ءاربىر جۇمىسسىز ازاماتپەن جەكە جۇمىس جۇرگىزىپ, ونى تولىق جۇمىسقا ورنالاسقانعا دەيىن سۇيەمەلدەۋدى قامتاماسىز ەتۋ تالاپ ەتىلدى.
جاڭا ءتاسىل ەڭبەك نارىعىنداعى تەڭگەرىمدى ارتتىرۋعا, الەۋمەتتىك وسال توپتاردىڭ تابىسىن وسىرۋگە جانە تۇراقتى جۇمىسپەن قامتۋدى قامتاماسىز ەتۋگە باعىتتالعان.
ەڭبەك نارىعىنداعى سايكەسسىزدىك: بوس جۇمىس ورنى كوپ پە الدە جۇمىسسىزدار ما؟
