The Wall Street Journal گازەتىندە جاريالانعان اتالمىش باياندامادا ەڭ وپتيميستىك بولجام بويىنشا مۇناي باعاسى 2025 جىلعا دەيىن 1 باررەلى 76 دوللار كولەمىنەن اسپايتىن بولادى, دەپ اتاپ كورسەتىلگەن. وپەك مۇنداي بولجامدى امەريكانىڭ مۇناي نارىعىنداعى قالىپتاسقان احۋالعا بايلانىستى كەلتىرىپ وتىر. سونىمەن بىرگە, گازەتتىڭ اتاپ كورسەتكەنىندەي, باياندامادا 2025 جىلى مۇناي باعاسىنىڭ ءاربىر باررەلى 40 دوللارعا دەيىن تومەندەپ كەتۋ مۇمكىندىگى دە قاراستىرىلعان. باياندامادا اتاپ كورسەتىلگەندەي, 2025 جىلعا دەيىن مۇناي باعاسىنىڭ ءاربىر باررەلىنىڭ 100 دوللارعا دەيىن كوتەرىلۋى ءتىپتى دە مۇمكىن ەمەس كورىنەدى.
The Wall Street Journal باسىلىمى الداعى جىلدارى مۇناي باعاسىنىڭ تۇراقسىزدىعى ساقتالاتىندىعىن ايتادى. وسى رەتتە گازەت وپەك ۇيىمىنا مۇشە مەملەكەتتەر مينيسترلەرىنىڭ ماۋسىم ايىندا بولاتىن كەزدەسۋىنە بايلانىستى مۇناي باعاسىنىڭ تاعى دا كۇرت قۇبىلۋىن جوققا شىعارمايدى.
«اقش-تا ورىن العان «تاقتاتاس توڭكەرىسىنە» بايلانىستى مۇناي باعاسىنىڭ كۇرت تومەندەپ كەتكەن وقيعاسىن وپەك ءالى كۇنگە جەتە زەرتتەي الماي وتىر. ادەتتە مۇناي كارتەلى الەمدىك نارىقتاعى مۇناي باعاسىن رەتتەۋ ءۇشىن مۇناي ءوندىرۋ كولەمىن ازايتىپ, رىنوكقا شىعارىلاتىن مۇناي كولەمىن رەتتەپ وتىراتىن. الايدا, وتكەن جىلى وپەك مۇنداي ءتاسىلدىڭ ەندى تيىمدىلىك بەرمەيتىندىگىن مويىندادى. سونىمەن بىرگە, ۇيىمعا مۇشە مەملەكەتتەر, اتاپ ايتقاندا, ساۋد ارابياسى مۇناي ءوندىرۋ كولەمىن ارتتىرىپ, رىنوكقا ۇلكەن مولشەردە شيكى مۇناي شىعارۋدى جۇزەگە اسىردى. وپەك باسشىلارىنىڭ مالىمدەۋىنشە, مۇناي باعاسى نەعۇرلىم تومەندەگەن سايىن مۇناي ءوندىرۋدىڭ وزىندىك قۇنى جوعارى بولىپ وتىرعان كومپانيالار بانكروتقا ۇشىرايدى. اسىرەسە, مۇناي باعاسىنىڭ تومەندەۋىنەن تاقتاتاس مۇنايىن وندىرەتىن كومپانيالار زارداپ شەگەتىن بولادى.
