زارداپ شەككەندەر سانى ارتۋدا
بانگكوكتە دۇيسەنبى كۇنى كەشكىلىك ەل استاناسى تايلاندتىڭ ورتالىعىندا بولعان تەررورلىق اكت سالدارىنان قازا تاپقاندار مەن جاراقاتتانعاندار سانى ارتا تۇسۋدە.
جەرگىلىكتى بيلىكتىڭ سوڭعى مالىمەتتەرىنە قاراعاندا, جارىلىستان 20 ادام قازا تاۋىپ, 123 ادام دەنە جاراقاتتارىن العان. پوليتسيانىڭ اقپاراتىنشا, قازا بولعانداردىڭ اراسىندا ءتورت شەتەلدىك بار كورىنەدى. ولاردىڭ ۇشەۋى قحر-دىڭ جانە بىرەۋى ءفيليپپيننىڭ ازاماتى. جارىلىس دۇيسەنبى كۇنى جەرگىلىكتى ۋاقىت بويىنشا 18 ساعات 56 مينۋتتا قالانىڭ ءدال ورتاسىندا ورىن العان بولاتىن. راديومەن باسقارىلاتىن قولدان جاسالعان بومبا ۇندىلەردىڭ ەراۆان قۇدايىنا ارنالعان قاسيەتتى ورىننىڭ شارباعىنىڭ جانىنا قويىلعان. بومبا جارىلعان ساتتە قاسيەتتى ورىنعا كەلۋشىلەر سانى وتە كوپ بولعان ەكەن.
نەمىستەر ارناۋلى قىزمەت باقىلاۋىنان ساقتانۋدا
جەرگىلىكتى جانە شەتەلدىك ارناۋلى قىزمەت وكىلدەرىنىڭ باقىلاۋ جاساۋىنان قاۋىپتەنگەن گەرمانيانىڭ كەيبىر تۇرعىندارى ميكروچيپتەردەگى اقپاراتتاردى ءوشىرىپ تاستاۋ ءۇشىن وزدەرىنىڭ جەكە باس كۋالىكتەرىن ميكروتولقىندى پەشتەردە «وڭدەۋدەن» وتكىزۋدە.
عالىمداردىڭ تولقۇجاتتاعى ميكروچيپ شپيوندىق ارەكەت ءۇشىن پايدالانۋعا جارامايدى دەگەندەرىنە قاراماستان, كوپتەگەن نەمىستەر ساقتىق شارالارىنا بارۋدا. وسىلايشا, وتكەن اپتادا فرانكفۋرت اۋەجايىندا 29 جاسار ەر ادام تۇتقىندالعان. پوليتسيانىڭ اقپاراتىنشا, ۇستالعان ادام ميكروچيپ ونىڭ جەكە ءومىرىنىڭ قول سۇعىلماستىعىنا نۇقسان كەلتىرەدى دەپ قاۋىپتەنىپ, ءوز قۇجاتىن ميكروتولقىندى پەشتە وڭدەۋدەن وتكىزگەن. سوڭعى كەزدەرى كەيبىر الەۋمەتتىك جەلىلەردە جەكە باس كۋالىگىن قالاي وڭدەۋ كەرەكتىگىنە ۇيرەتەتىن بەينەروليكتەر پايدا بولا باستاعانى دا بەلگىلى بولىپ وتىر.
اقش-تى جاڭا قارۋمەن قورقىتپاق
سولتۇستىك كورەيا اقش-قا بۇعان دەيىن الەمگە بەلگىسىز شابۋىلداۋشى قۇرالمەن شابۋىل جاسايتىندىعىن ايتىپ كۇش كورسەتكەن, دەپ حابارلايدى CNN اگەنتتىگى. وعان اقش-پەن وڭتۇستىك كورەيانىڭ جوسپارلانعان بىرلەسكەن جاتتىعۋلارى سەبەپكەر بولىپ وتىر.
كحدر اسكەري جاتتىعۋلاردى وتكىزبەۋدى تالاپ ەتۋدە. ال, وداقتاستار بولسا بۇل شارا ءوڭىردى قورعاۋ جانە كورەيا تۇبەگىندەگى تۇراقتىلىقتى ساقتاۋ ماقساتىن كوزدەيدى دەگەن دالەلدى كولدەنەڭ تارتۋدا. كحدر-دىڭ قازىرگى ارمياسى مەن حالقى بۇگىندە بۇرىنعىداي اقش-قا قولىنا ۆينتوۆكا الىپ قارسى تۇراتىن بەيشارا جاعدايدا ەمەس. ەندىگى جەردە سولتۇستىك كورەيا الەمگە بەيمالىم شابۋىلداۋشى جانە قورعانىس قۇرالدارىمەن جاراقتانعان, دەپ مالىمدەگەن كحدر ۇلتتىق قورعانىس كوميتەتىنىڭ ءباسپاسوز حاتشىسى. اقش اتىنا كۇش كورسەتۋدى مەملەكەتتىك تەلەارنا جۇرگىزۋشىسى دە قايتالاعان. ول سولتۇستىك كورەيانىڭ بۇل جولى اقش-قا ونىڭ ءوز اۋماعىندا شابۋىل جاسايتىنىن اتاپ كورسەتكەن.
كەلىمسەكتەردى ەلدەن كەتىرمەك
امەريكالىق ميللياردەر دونالد ترامپ 2016 جىلعى پرەزيدەنت سايلاۋىندا جەڭىسكە جەتكەن جاعدايدا زاڭسىز ميگرانتتاردى ەلدەن قۋىپ شىقپاق نيەتتە, دەپ حابارلايدى ريا نوۆوستي اگەنتتىگى.
ولار كەتۋگە ءتيىس... ءبىزدىڭ ەلىمىز نە بولادى, نە بولمايدى, دەپ مالىمدەگەن ترامپ. سونداي-اق, ول پرەزيدەنت باراك وبامانىڭ كوشى-قون ساياساتى سالاسىنداعى جارلىعىنىڭ كۇشىن جوياتىندىعىن دا اتاپ كورسەتكەن. قوعامدىق پىكىرگە جۇرگىزىلگەن ساۋالناماعا سايكەس, دونالد ترامپ ازىرگە رەسپۋبليكالىق پارتيادان پرەزيدەنتتىك لاۋازىمعا بارلىق ۇمىتكەرلەردەن وزىق كەلەدى. بۇعان دەيىن ول ەگەر قاجەت بولسا ءوزىنىڭ سايلاۋالدى ناۋقانىنا ميلليارد دوللار جۇمساۋعا دايىن ەكەنىن حابارلاعان بولاتىن. سونىمەن بىرگە, ول جىل سايىن ءوزىنىڭ 400 ميلليون دوللار تابىس تاباتىنىن دا جاسىرىپ قالماعان كورىنەدى.
ۋساما بەن لادەننىڭ بالاسى شابۋىل جاساۋعا شاقىردى
«ءال-كايدا» باتىس ەلدەرىنە شابۋىل جاساۋعا شاقىرعان ۋساما بەن لادەننىڭ بالاسىنىڭ (بولجام بويىنشا) حابارىن تاراتقان. تەررورلىق توپتىڭ سودىرلارى Twitter-دە حامزا بەن لادەن دەپ اتالاتىن ادامنىڭ بەينەحابارىن جاريالاعان كورىنەدى.
ونىڭ جاسى شامامەن 23 نەمەسە 24-تە. اۋديوجازباداعى ەر ادامنىڭ داۋسى اقش پەن ونىڭ وداقتاستارىنا شابۋىل جاساۋعا ۇندەگەن. الدا تۇرعان «نىسانالار» رەتىندە ول لوندوندى, ۆاشينگتوندى, ءپاريجدى, تەل-ءاۆيۆتى جانە تاياۋ شىعىستىڭ تاعى بىرنەشە قالالارىن اتاعان. ەسكە سالا كەتسەك, ۋساما بەن لادەن امەريكالىق ارناۋلى قىزمەتتىڭ جۇرگىزگەن وپەراتسياسى ناتيجەسىندە 2011 جىلدىڭ مامىرىندا پاكىستاننىڭ اببوتاباد قالاسىنىڭ شەت ايماعىندا ولتىرىلگەن بولاتىن.
الەمدەگى ەڭ ۇزاق رەيس جۇزەگە اسىرىلماق
Emirates اۋە كومپانياسى الەمدەگى ەڭ ۇزاق ۇشاتىن رەيستى ىسكە قوسپاق. ول باعىت دۋباي مەن پانامانى جالعاستىراتىن بولادى.
ۇزاقتىعى 13,8 مىڭ كيلومەتردى قۇرايتىن جاڭا باعىت بويىنشا العاشقى ۇشۋ 2016 جىلدىڭ 1 اقپانىندا جۇزەگە اسپاق. دۋبايدان پاناماعا دەيىنگى جولعا كەتەتىن ەسەپتى ۋاقىت 17 ساعات 35 مينۋتتى, ال كەيىن قاراي 15 ساعات 45 مينۋتتى قۇرايتىن بولادى. رەيستى Boeing 777-200 LR ۇشاعىنىڭ ورىندايتىنى دا بەلگىلى بولىپ وتىر. لاينەردىڭ بورتىندا ءبىرىنشى كلاستى سەگىز ورىن, بيزنەس-كلاستى 42 ورىن جانە ەكونوم كلاستاعى 216 ورىن بولماق. ايتا كەتۋ كەرەك, بۇعان دەيىن 17 ساعاتقا سوزىلعان الەمدەگى ەڭ ۇزاق ۇشۋدى اۆستراليالىق Qantas كومپانياسى جۇزەگە اسىرعان بولاتىن. ول ۇشاق اقش-تىڭ داللاس قالاسىنان سيدنەيگە ۇشىپ بارعان ەدى.
ەكۆادوردا توتەنشە جاعداي جاريالاندى
ەكۆادور پرەزيدەنتى رافاەل كوررەا كوتوپاحي جانارتاۋى ويانعان اۋداندا توتەنشە جاعداي جاريالادى, دەپ حابارلادى AFP اقپارات اگەنتتىگى.
ءبىز كوتوپاحي جانارتاۋىنىڭ بەلسەندىلىگىنە بايلانىستى توتەنشە جاعداي جاريالايمىز. نەلىكتەن مەن مۇنداي شەشىم قابىلداپ وتىرمىن. ول ىقتيمال زارداپتاردى شەشۋ ءۇشىن رەسۋرستاردى قامتاماسىز ەتۋگە جانە قاجەتتى كۇشتەردى جۇمىلدىرۋعا قاجەت, دەپ اتاپ كورسەتكەن كوررەا ءوزىنىڭ اپتا سايىنعى حالىققا ارناعان ۇندەۋىندە. ريا نوۆوستي اگەنتتىگىنىڭ مالىمەتتەرىنە قاراعاندا, الدىن الۋ شارالارى شەڭبەرىندە قازىردىڭ وزىندە ەلدىڭ ورتالىعىنداعى شاعىن ەلدى مەكەندەردەن شامامەن 400-دەي ادام باسقا جاققا كوشىرىلگەن. اۋانىڭ لاستانۋىنا بايلانىستى جەرگىلىكتى تۇرعىندار مەديتسينالىق بەتپەردە كيۋگە ءماجبۇر بولۋدا. ەل استاناسىنان شامامەن 60 شاقىرىم جەردەگى كوتوپاحي جانارتاۋى وتكەن جۇمادا اتقىلاعان بولاتىن.
ينتەرنەت ماتەريالدارى نەگىزىندە ازىرلەندى.
