ءىس-شاراعا ەلىمىز بەن قىتايدىڭ مەملەكەتتىك ورگاندارىنىڭ, ينۆەستيتسيالىق قورلارىنىڭ, قارجى ينستيتۋتتارىنىڭ, دەۆەلوپەرلىك جانە تەحنولوگيالىق كومپانيالارىنىڭ وكىلدەرى قاتىستى.
قاتىسۋشىلارعا الاتاۋ قالاسىن دامىتۋدىڭ نەگىزگى باعىتتارى, ونىڭ ىشىندە ينۆەستورلارعا ارنالعان جەڭىلدىكتى جاعدايلار, ينۆەستيتسيالىق جوبالاردى ء«بىر تەرەزە» قاعيداتى نەگىزىندە سۇيەمەلدەۋ, سونداي-اق ارنايى قۇقىقتىق رەجىمنىڭ باسقا دا مۇمكىندىكتەرى تانىستىرىلدى.
يننوۆاتسيالار, تسيفرلىق باسقارۋ مەن ينۆەستيتسيالار تارتۋ سالاسىنداعى الەمدىك كوشباسشىلاردىڭ ءبىرى – شەنچجەن تاجىريبەسىن زەردەلەۋگە ەرەكشە نازار اۋدارىلدى. قىتاي مەگاپوليسىنىڭ وزىق تاجىريبەلەرىن الاتاۋ قالاسىن دامىتۋ بارىسىندا پايدالانۋ جوسپارلانىپ وتىر. اتاپ ايتقاندا, جاڭا بۋىنداعى اككۋمۋلياتورلار, ەنەرگيا ساقتاۋ جۇيەلەرى, زاماناۋي اۋىل شارۋاشىلىعى تەحنيكاسى وندىرىستەرىن قۇرۋ, ەلەكتر كولىگى مەن قۋاتتاۋ ينفراقۇرىلىمىن دامىتۋ, ونەركاسىپتىك كاسىپورىنداردى, ەنەرگەتيكا نىساندارىن, ينجەنەرلىك, كولىك پەن لوگيستيكالىق ينفراقۇرىلىمدى سالۋ, سونداي-اق Smart City تەحنولوگيالارىن ەنگىزۋ تۋرالى كەلىسىمدەرگە قول قويىلدى.
روۋد-شوۋ اياسىندا جەتەكشى قىتايلىق كورپوراتسيالار مەن ينۆەستيتسيالىق توپتاردىڭ باسشىلىعىمەن بىرقاتار ەكىجاقتى كەزدەسۋ وتكىزىلدى. كەلىسسوزدەر بارىسىندا قىتاي كومپانيالارىنىڭ Alatau City جوبالارىن جۇزەگە اسىرۋعا قاتىسۋى, وندىرىستەردى لوكاليزاتسيالاۋ, تەحنولوگيالار ترانسفەرتى, قالانى دامىتۋ سالاسىندا وزىق تاجىريبەمەن الماسۋ ماسەلەلەرى تالقىلاندى.
ءىس-شارا قورىتىندىسىندا ىنتىماقتاستىق تۋرالى 24 كەلىسىمگە قول قويىلدى. ونەركاسىپ, ەنەرگەتيكا, لوگيستيكا, جوعارى تەحنولوگيالار, قالالىق ينفراقۇرىلىم, تسيفرلىق ەكونوميكا سالالارىندا جالپى ينۆەستيتسيالىق الەۋەتى 6 ملرد دوللارعا دەيىنگى جوبالاردى جۇزەگە اسىرۋ تۋرالى ۋاعدالاستىقتارعا قول جەتكىزىلدى.
شەنچجەندەگى روۋد-شوۋ حالىقارالىق نارىقتا Alatau City-ءدىڭ ينۆەستيتسيالىق مۇمكىندىكتەرىن ىلگەرىلەتۋدىڭ ماڭىزدى كەزەڭى بولدى ءارى بيزنەستىڭ الاتاۋ قالاسىن دامىتۋعا قاتىسۋعا دەگەن جوعارى قىزىعۋشىلىعىن راستادى.
ينۆەستورلاردى تارتۋ جونىندەگى جۇمىس گونكونگتەگى جەتەكشى ينۆەستيتسيالىق قورلاردىڭ, قارجى ۇيىمدارىنىڭ, بانكتەردىڭ, ساقتاندىرۋ كومپانيالارى مەن تەحنولوگيالىق كورپوراتسيالاردىڭ قاتىسۋىمەن وتەتىن كەلەسى ءىس-شارالار اياسىندا جالعاسادى.
