اياقتالعان وقۋ جىلى ەرتىس-بايان ءوڭىرى ءۇشىن اسا ناتيجەلى بولدى. پاۆلودارلىق جاس ورەندەر ءتۇرلى دەڭگەيدەگى بەدەلدى زياتكەرلىك جارىستاردا 307 مەدال جەڭىپ الىپ, جىل قورىتىندىسى بويىنشا وبلىس قۇراماسى «ۇزدىك وليمپيادالىق كوماندا – 2026» اتاندى.
وقۋشىلاردى جەتىستىكتەرىمەن قۇتتىقتاعان ءوڭىر باسشىسى جاس تالانتتاردىڭ تابىستارى بۇكىل وبلىس ءۇشىن ەرەكشە ماقتانىش ەكەنىن اتاپ ءوتتى.
– بۇگىن وسى زالعا جينالعان تالانتتى جاستار – وتانىن شىنايى سۇيەتىن پاتريوت ۇرپاقتىڭ ۇزدىك وكىلدەرى. بيىل وبلىسىمىز 307 مەدال جەڭىپ الىپ, ەلىمىزدىڭ كوشباسشى وڭىرلەرىنىڭ قاتارىنا ەندى. حالىقارالىق دەڭگەيدەگى 56 ماراپات بارشامىزعا ۇلكەن ماقتانىش. بۇل پاۆلودارلىق وقۋشىلاردىڭ جوعارى زياتكەرلىك الەۋەتىنىڭ ايقىن دالەلى, – دەدى اسايىن بايحانوۆ.
ول قازىرگى الەمنىڭ تەحنولوگيالاردىڭ ىقپالىمەن قارقىندى وزگەرىپ جاتقانىن اتاپ ءوتىپ, بۇگىنگى وقۋشىلار ەرتەڭگى جاڭاشىل وزگەرىستەردىڭ كوشباسشىلارى بولاتىنىن ايتتى. سونىمەن قاتار ادالدىق, جاۋاپكەرشىلىك, ادىلدىك سەكىلدى قۇندىلىقتاردىڭ ماڭىزدىلىعىنا توقتالدى. ۇستازدار مەن اتا-انالارعا دا العىس سوزدەر ايتىلدى. ءاربىر جوعارى جەتىستىكتىڭ ارتىندا ۇزاق جىلعى ەڭبەك, وتباسىنىڭ قولداۋى مەن ۇستازداردىڭ كاسىبيلىگى تۇرعانىن ەرەكشە اتاپ ءوتتى.
ءوڭىر باسشىسى حالىقارالىق جانە رەسپۋبليكالىق زياتكەرلىك جارىستاردىڭ جەڭىمپازدارى مەن جۇلدەگەرلەرىنە العىسحاتتار مەن اقشالاي سەرتيفيكاتتار تابىستادى. ال وقۋشىلار وبلىس باسشىلىعىنا كورسەتكەن جان-جاقتى قولداۋى مەن قامقورلىعى ءۇشىن العىستارىن ءبىلدىردى.
– وڭىرىمىزدە ماقتان تۇتۋعا تۇرارلىق تالانتتى ءارى دارىندى جاستار وتە كوپ. جاس دارىندارعا قولداۋ كورسەتۋ ءبىزدى ودان ءارى دامۋعا, جاڭا ءبىلىم الۋعا ىنتالاندىرادى, – دەدى پاۆلودار قالاسىنداعى ەر بالالارعا ارنالعان ء«بىلىم-يننوۆاتسيا» ليتسەي-ينتەرناتىنىڭ وقۋشىسى, اشىق حالىقارالىق وليمپيادانىڭ جانە بيولوگيا ءپانى بويىنشا رەسپۋبليكالىق وليمپيادانىڭ التىن مەدال يەگەرى ەرسۇلتان قايىركەن.
«بۇگىن وسى جەردە بولۋ – ارقايسىمىز ءۇشىن ۇلكەن مارتەبە ءارى زور ماقتانىش. وليمپيادالارداعى جەڭىستەرىمىزدىڭ ارتىندا وبلىس باسشىلىعى تاراپىنان كورسەتىلەتىن ۇلكەن قولداۋ تۇر. جاستاردىڭ الەۋەتىنە سەنىپ, ءار تالانتتىڭ اشىلۋىنا جاعداي جاساپ وتىرعاندارىڭىز ءۇشىن العىسىمىزدى بىلدىرەمىز», دەدى پاۆلودار قالاسىنداعى №8 مەكتەپ-ليتسەيىنىڭ وقۋشىسى يۋليا كاتۋنينا. ول قىزدار اراسىنداعى ەۋروپالىق وليمپيادانىڭ جانە رەسپۋبليكالىق وليمپيادانىڭ كۇمىس جۇلدەگەرى, سونداي-اق ازيا-تىنىق مۇحيتى حالىقارالىق وليمپياداسى مەن «جىبەك جولى» حالىقارالىق وليمپياداسىنىڭ قولا جۇلدەگەرى.
پاۆلودار وبلىسى
