كتك ارناسىنىڭ مالىمەتىنشە, 11 جاستاعى ءامىر سوڭعى قوڭىراۋ مەرەكەسىنە دايىندالىپ جۇرگەن. الايدا قازىر ول مەرەكەنىڭ ورنىنا اۋرۋحانا توسەگىنە تاڭىلعان. بىرنەشە كۇن بۇرىن بالا دوستارىمەن ءۇي ماڭىنداعى ويىن الاڭىندا ويناپ جۇرگەن كەزدە ۇشى شىعىپ تۇرعان تەمىرگە سۇرىنىپ قۇلاپ, جاراقاتتانعان.
بالانىڭ تۋىسى دانارا داريشەۆا جاراقاتتىڭ وتە اۋىر بولعانىن ايتقان.
– جارانى سوزبەن جەتكىزۋ مۇمكىن ەمەس. اياعىنداعى كەسىلگەن جەر وتە تەرەڭ بولدى. دارىگەرلەر ونى شۇعىل تۇردە وپەراتسياعا الىپ كىرىپ, تىگىس سالدى. قازىر بۇل الاڭ يەسىز قالعانداي. اكىمدىك مەردىگەردى, مەردىگەر اكىمدىكتى كىنالايدى. ال جاز بويى بالالار وسى جەردە وينايدى, بىراق مۇندا قاۋىپسىزدىك جوق, – دەدى ول.
قازىر ءامىر سول اياعىن تولىق باسا المايدى جانە قاتتى اۋىرسىنۋعا شاعىمدانادى. دارىگەرلەردىڭ ايتۋىنشا, ەگەر تەمىر ىستىك ارتەرياعا تيگەندە جاعداي الدەقايدا اۋىر بولۋى مۇمكىن ەدى.
اكىمجان اۋباكىروۆ بالانىڭ جامباس تۇسىنان جىرتىلعان جاراقاتپەن تۇسكەنىن ايتتى. وعان العاشقى حيرۋرگيالىق كومەك كورسەتىلىپ, جاراسىنا تىگىس سالىنعان. قازىرگى جاعدايى قاناعاتتانارلىق دەپ باعالانىپ وتىر.
تارازدا مەكتەپ اۋماعىندا بيىكتىكتەن قۇلاعان وقۋشى اۋىر جاراقات الدى
وقيعا بولعان ويىن الاڭى كەڭەس نوكين تۇرعىن الابى اۋماعىندا ەكى جىل بۇرىن «حالىق قاتىساتىن بيۋدجەت» باعدارلاماسى اياسىندا سالىنعان. الاڭدى ورناتۋعا باستاماشى بولعانداردىڭ ءبىرى – جاراقات العان ءامىردىڭ اكەسى. ول تۇرعىنداردى جيناپ, قاجەتتى قۇجاتتاردى راسىمدەگەن.
الايدا شەنەۋنىكتەر ويىن الاڭى كوپتەگەن زاڭبۇزۋشىلىقپەن سالىنعانىن مويىندادى. سول سەبەپتى نىسان ءالى كۇنگە دەيىن اكىمدىك بالانسىنا قابىلدانباعان.
اقتوبە قالاسى الماتى اۋدانى اكىمدىگىنىڭ تۇرعىن ءۇي-كوممۋنالدىق شارۋاشىلىق ءبولىمىنىڭ باس مامانى جادىگەر بالتاباي سوت ساراپتاماسى الاڭنىڭ ساپاسىز سالىنعانىن انىقتاعانىن مالىمدەدى. ونىڭ ايتۋىنشا, مەردىگەر كومپانيا اتقارىلعان جۇمىس ءۇشىن تولەم الا الماعان. قازىر بۇل ماسەلە بويىنشا ءىس جوعارعى سوتتا قارالىپ جاتىر.
ويىن الاڭىنىڭ قۇنى 33 ميلليون تەڭگەنى قۇراعان. ال ازىرگە سوت داۋى جالعاسىپ جاتقاندا, بالالار قاۋىپتى كونسترۋكتسيالار اراسىندا ويناۋعا ءماجبۇر بولىپ وتىر.
