فوتو: Mehmet Ali Özcan / AA
انادولى اگەنتتىگىنىڭ جازۋىنشا, «تاۋەلسىزدىكتىڭ 35 جىلدىعىندا تۇركيا-قازاقستان قاتىناستارى» اتتى كىتاپ تۇركيانىڭ ادىلەت جانە دامۋ پارتياسى (AK Parti) توراعاسىنىڭ ورىنباسارى, تۇركى مەملەكەتتەرىمەن بايلانىس باسقارماسىنىڭ توراعاسى كۇرشاد زورلۋدىڭ رەداكتورلىعىمەن دايىندالعان جانە وعان 10 اكادەميك پەن اۆتوردىڭ عىلىمي-تالدامالىق ماتەريالدارى توپتاستىرىلعان.
كىتاپتىڭ العى ءسوزىن تۇركيا رەسپۋبليكاسىنىڭ پرەزيدەنتى رەجەپ تايپ ەردوعان ءوزى جازىپ, مەملەكەتتىك ساپارى بارىسىندا استانادا ارىپتەسى – قازاقستاننىڭ مەملەكەت باسشىسى قاسىم-جومارت توقاەۆقا تارتۋ ەتتى.
جيناق-كىتاپتىڭ كىرىسپەسىنە پرەزيدەنت ەردوعان: «تۇركيا مەن قازاقستان اراسىنداعى قاتىناستار الداعى كەزەڭدە ودان ءارى نىعايىپ, تەرەڭدەي تۇسەتىنىنە سەنىمىمىز مول. وسىنداي ەڭبەكتەر ءوزارا تۇسىنىستىكتى كۇشەيتىپ, ىنتىماقتاستىق مۇمكىندىكتەرىن كەڭەيتىپ, ورتاق تاريح پەن بولاشاققا دەگەن كوزقاراستى نىعايتاتىن ماڭىزدى مىندەت اتقاراتىنى ءسوزسىز. ەكى ەل اراسىنداعى بايلانىستار تۇركى مەملەكەتتەرى ۇيىمى اياسىنداعى كوپجاقتى ىنتىماقتاستىق تەتىكتەرى ارقىلى ەكىجاقتى ولشەمنەن اسىپ ءتۇستى. قادىرلى باۋىرىم قازاقستان پرەزيدەنتى قاسىم-جومارت توقاەۆتىڭ پاراساتتى ءارى كورەگەن كوشباسشىلىعىنىڭ ارقاسىندا بۇل قاتىناستار ءوزارا كۇش-جىگەرىمىزدىڭ ناتيجەسىندە جاڭا سەرپىنگە يە بولدى. ەڭبەكتى دايىنداۋعا ۇلەس قوسقان AK Parti تۇركى مەملەكەتتەرىمەن بايلانىس باسقارماسىنا جانە ءوز سالاسىنىڭ مايتالماندارى سانالاتىن – قادىرلى عالىمدارىمىزعا العىس بىلدىرەمىن. بۇل ەڭبەكتىڭ تۇركيا مەن قازاقستان اراسىنداعى دوستىق پەن باۋىرلاستىقتى ودان ءارى نىعايتۋعا سەپتىگىن تيگىزۋىنە تىلەكتەسپىن», دەپ جازدى.
كۇرشاد زورلۋ جۋرناليستەرگە بەرگەن سۇحباتىندا AK Parti تۇركى مەملەكەتتەرىمەن بايلانىس باسقارماسى ماڭىزدى ەڭبەككە باستاماشى بولعانىن اتاپ ءوتتى.
ء«بىز بۇل ەڭبەكتى قازاقستان تاۋەلسىزدىگىنىڭ 35 جىلدىعىنا ارنايى دايىندادىق. كىتاپتىڭ تۇرىك جانە قازاق تىلدەرىندە جارىق كورۋى ءارى ەلدەرىمىزگە قاجەت ەڭ تەرەڭ تاقىرىپتاردى قامتۋى وتە ماڭىزدى. كىتاپتىڭ ارتقى مۇقاباسىنا ەكى پرەزيدەنتتىڭ «ورتا ءدالىز» تۋرالى سوزدەرىن ارنايى ورنالاستىردىق. مۇنىڭ ءوزى تۇركيا-قازاقستان قاتىناستارىنىڭ ەۋرازيا ەكونوميكاسى ءۇشىن ماڭىزىن ايقىن كورسەتەدى», دەدى ول.
ەسكە سالا كەتەيىك, 13 مامىردا تۇركيا پرەزيدەنتى رەجەپ تايپ ەردوعان قازاقستانعا مەملەكەتتىك ساپارمەن كەلدى. ونى اۋەجايدا قاسىم-جومارت توقاەۆ ءوزى قارسى الدى. مەملەكەت باسشىسى قاسىم-جومارت توقاەۆ الەۋمەتتىك جەلىدەگى پاراقشاسىندا رەجەپ تايپ ەردوعانمەن بىرگە تۇسكەن فوتوسىن جاريالادى.
