فوتو: Pixabay
ساراپشىلار ەكونوميكانىڭ ءوسىمى ءبىر عانا سەكتوردىڭ ەسەبىنەن ەمەس, بىرنەشە نەگىزگى سالانىڭ قاتار دامۋى ارقىلى قالىپتاسىپ وتىرعانىن اتاپ ءوتتى. ماسەلەن, قۇرىلىس, كولىك جانە لوگيستيكا, ساۋدا, اۋىل شارۋاشىلىعى مەن وڭدەۋ ونەركاسىبى ەكونوميكانىڭ نەگىزگى درايۆەرىنە اينالعان.
بۇل ەكونوميكالىق ءوسىم قۇرىلىمىنىڭ اناعۇرلىم تۇراقتى بولا باستاعانىن كورسەتەدى. ءوندىرۋشى ونەركاسىپ سالاسىندا قىسىم ساقتالعانىنا قاراماستان, ەل ەكونوميكاسىنىڭ جالپى ديناميكاسى وڭ باعىتتا دامىپ وتىر.
تسيفرلىق ەكونوميكا ءىجو-گە قالاي اسەر ەتەدى؟ پرەزيدەنت ۇسىنىستار ەنگىزۋدى تاپسىردى
ءىجو وسىمىنە وندىرىستىك سەكتورلار سەرپىن بەرىپ كەلەدى
قازىرگى ەكونوميكالىق ديناميكانىڭ باستى ەرەكشەلىگى – ءوسىمنىڭ شيكىزات سەكتورىنان ەمەس, شيكىزاتتىق ەمەس نەگىزگى سالالاردان قالىپتاسۋى. اتاپ ايتقاندا, قۇرىلىس, كولىك, ساۋدا, اۋىل شارۋاشىلىعى جانە اسىرەسە وڭدەۋ ونەركاسىبى ەكونوميكانىڭ نەگىزگى قوزعاۋشى كۇشىنە اينالىپ وتىر.
وڭدەۋ ونەركاسىبىنىڭ 9,9 پايىزعا ءوسۋى – ەكونوميكا قۇرىلىمىنداعى ماڭىزدى وزگەرىستىڭ بەلگىسى. مۇنداي قارقىن سالانى سوڭعى جىلدارداعى ەڭ جوعارى كورسەتكىشتەرگە جاقىنداتىپ, ەلدىڭ وندىرىستىك بازاسى ءارتاراپتانىپ كەلە جاتقانىن اڭعارتادى.
وڭدەۋ ونەركاسىبى ونەركاسىپ ءوسىمىنىڭ باستى درايۆەرىنە اينالدى
ءتورت ايدىڭ قورىتىندىسى بويىنشا ونەركاسىپ وندىرىسىندە دە ءوسىم بايقالىپ وتىر. ۇلتتىق ەكونوميكا مينيسترلىگىنىڭ مالىمەتىنشە, ناقتى كولەم يندەكسى – 102,1 پايىزعا جەتتى.
بۇل وسىمگە, ەڭ الدىمەن وڭدەۋ سەكتورىنىڭ جەدەل دامۋى اسەر ەتتى. قاڭتار-ءساۋىر ايلارىندا وڭدەۋ ونەركاسىبى – 9,9 پايىزعا ءوستى. ال قاڭتار-ناۋرىز قورىتىندىسىندا بۇل كورسەتكىش – 8,5 پايىز بولعان.
ياعني, ونەركاسىپ ءوسىمى تەك شيكىزات ءوندىرىسىنىڭ ەسەبىنەن ەمەس, قوسىلعان قۇنى جوعارى ءونىم شىعاراتىن سالالاردىڭ دامۋى ارقىلى قامتاماسىز ەتىلىپ وتىر.
سەرىك جۇمانعارين: ەلىمىزدىڭ ءىجو مولشەرى 300 ملرد دوللاردان استى
وڭدەۋ ونەركاسىبى سوڭعى جىلدارداعى ەڭ جوعارى قارقىنداردىڭ ءبىرىن كورسەتتى
وڭدەۋ ونەركاسىبىندەگى تاريحي ەڭ جوعارى ءوسىم 2017 جىلى تىركەلگەن. ول كەزدە قاڭتار-ءساۋىر ايلارىنداعى يندەكس 114,3 پايىزعا جەتكەن ەدى.
قازىرگى كورسەتكىش 2020 جىلدىڭ باسىنداعى جوعارى قارقىننان دا اسىپ ءتۇستى. اتالعان كەزەڭدە قاڭتار-اقپان ايلارىندا وڭدەۋ ونەركاسىبىنىڭ ءوسىمى 109,4 پايىز بولعان.
