سۋرەتتى تۇسىرگەن – ەرلان ومار, «EQ»
سەرىكتەستىكتىڭ باس ديرەكتورى ديحان قامزابەك ۇلى تاريحى تامىرلاس, ورتاق رۋحاني قۇندىلىقتارعا يە قوس مەملەكەت اراسىندا جولعا قويىلعان باۋىرلاستىق قارىم-قاتىناسقا وڭ باعاسىن بەرە كەلە, الداعى ۋاقىتتا دا بارلىق سالادا ءوزارا ىقپالداستىق پەن ىزگى بايلانىستار نىعايا بەرەرىنە سەنىم ءبىلدىردى.
«قازاق جۇرتى ءۇشىن پارسى وركەنيەتى مەن مادەنيەتىنىڭ ورنى ايرىقشا. جۋىردا عانا ءبىز ورتاق ۇلىق مەرەكەمىز – ءاز ناۋرىزدى كەڭ كولەمدە اتاپ وتتىك. پرەزيدەنتىمىز قاسىم-جومارت كەمەل ۇلىنىڭ ءوزى ۇلىستىڭ ۇلى كۇنىنە ەرەكشە ماڭىز بەرىپ, ناۋرىزناما ونكۇندىگىن تويلاۋدى يگى داستۇرگە اينالدىردى. ەكى حالىقتىڭ رۋحاني قۇندىلىقتارىندا دۇنيەتانىمدىق جاقىندىق بار. قازاق تىلىندە پارسى سوزدەرى كوپ كەزدەسەتىنى سەكىلدى پارسى ءتىلى دە تۇركى سوزدەرىنەن كەندە ەمەس. بۇل – ءبىزدىڭ بايلانىسىمىز ىقىلىم زاماندار تەرەڭىنە كەتەتىنىن ءارى ءوزارا دوستىق پەن باۋىرمالدىققا نەگىز بولاتىنىن ايقىن كورسەتەدى. سونداي-اق ءبىز وركەنيەت تاريحى تەرەڭ يران جەرىندە تىنىشتىق ورناپ, ءوڭىردىڭ بەرەكەسى ارتۋىنا تىلەكتەسپىز», دەپ اتاپ ءوتتى د.قامزابەك ۇلى.
ەلشى ءالي اكبار دجوۋكار مىرزا قازاقستان مەن يراننىڭ قارىم-قاتىناسى تەك ديپلوماتيالىق دەڭگەيمەن شەكتەلمەيتىنىن, بۇل تەرەڭ تاريحي, مادەني جانە وركەنيەتتىك تامىرلارعا نەگىزدەلگەن بايلانىس ەكەنىن اتاپ ءوتتى. سونداي-اق ءوزارا ەكونوميكالىق, ساۋدا-ساتتىق الىس-بەرىستى دە نازاردان تىس قالدىرماي, جانداندىرا بەرۋ ۋاقىت تالابى ەكەنىن ايتتى.
كەزدەسۋ سوڭىندا تاراپتار الداعى ۋاقىتتا دا ءوزارا ىنتىماقتاستىقتىڭ جالعاسا بەرەرىنە سەنىم ءبىلدىردى. ديحان قامزابەك ۇلى يران ەلشىسىنە جۋىردا جارىق كورگەن ءابىش كەكىلباي ۇلى تۋرالى كىتاپتى سىيعا تارتتى.
«قازاق پەن پارسى حالىقتارى قارت كاسپيدىڭ قوس تاراپىن جايلاپ وتىرمىز. سول تەڭىزدىڭ بەرگى جاعاسىندا, قاسيەتتى ماڭعىستاۋ جەرىندە دۇنيەگە ەسىگىن اشقان قازاقتىڭ ايگىلى جازۋشىسى ءابىش كەكىلباي ۇلى ءوز ەڭبەكتەرىندە يران تۋرالى دا كوپ دەرەك كەلتىرگەن. بۇل كىتاپتا دا ءسىزدىڭ ەلىڭىز تۋرالى مالىمەتتەر از ەمەس», دەپ اتاپ ءوتتى سەرىكتەستىك باسشىسى.
