فوتو: اقوردا
قازاقستان پرەزيدەنتى ءداستۇرلى قوناقجايلىق تانىتقان ۆلاديمير پۋتينگە العىس ايتىپ, رەسەي حالقىن ۇلى جەڭىستىڭ 81 جىلدىعىمەن قۇتتىقتادى.
– ۇلى جەڭىس مەرەكەسى قارساڭىندا سىزبەن ماسكەۋدە جۇزدەسكەنىمە قۋانىشتىمىن. بۇل «كوزىمىز جاسقا تولىپ» قارسى الاتىن مەرەكە. ويتكەنى ادامزات تاريحىنداعى ەڭ قانقۇيلى سوعىستا وپات بولعان باتىرلارىمىزدىڭ رۋحىنا تاعزىم ەتەمىز. كەڭەس وكىمەتى ۇلى وتان سوعىسىندا ءفاشيزمدى جەڭىپ, ەكىنشى دۇنيەجۇزىلىك سوعىستان الپاۋىت ەل بولىپ شىقتى. بىرىككەن ۇلتتار ۇيىمىن قۇرۋشىلاردىڭ بىرىنە اينالدى. ءبىز مۇنى ەشقاشان ۇمىتپايمىز. ارداگەرلەرىمىزدى ارداق تۇتامىز. قازاقستاندا سوعىسقا قاتىسقان كوزى ءتىرى 57 مايدانگەر قالدى, – دەدى مەملەكەت باسشىسى.
پرەزيدەنت ەكى ەلدىڭ سان قىرلى ىقپالداستىعى جىل وتكەن سايىن ارتىپ, بارلىق باعىت بويىنشا قارقىندى دامىپ كەلە جاتقانىن اتاپ ءوتتى.
– ەلدەرىمىز اراسىنداعى ىنتىماقتاستىققا كەلەر بولساق, ءسىزدىڭ مامىر ايىنىڭ سوڭىنا جوسپارلانعان مەملەكەتتىك ساپارىڭىزعا قىزۋ دايىندالىپ جاتىرمىز. سوڭعى بەس جىلدىڭ قورىتىندىسى بويىنشا, رەسەي – قازاق ەكونوميكاسىنىڭ ەڭ باستى ينۆەستورلارىنىڭ ءبىرى. ساۋدا-ساتتىق تا تابىستى دامىپ كەلەدى. الدىن الا بولجامعا سايكەس, بيىل تاۋار اينالىمى 30 ميلليارد دوللار مەجەسىنەن اسىپ تۇسەدى. بۇل – وتە جاقسى كورسەتكىش. ەكى ەلدىڭ ءبىلىم بەرۋ سالاسىنداعى گۋمانيتارلىق بايلانىستارىنا ايرىقشا توقتالساق, «سيريۋس» مەكتەپتەرى استانا, الماتى جانە باسقا دا قالالاردا اشىلىپ, جۇمىس ىستەي باستادى. تۋريزم دە وتە ماڭىزدى باعىت. بىلتىر قازاقستانعا ساياحاتتاپ كەلگەن تۋريستەردىڭ سانى جاعىنان رەسەي ءبىرىنشى ورىنعا شىقتى, – دەدى قاسىم-جومارت توقاەۆ.
مەملەكەت باسشىسى الداعى جوعارى ەۋرازيالىق ەكونوميكالىق كەڭەستىڭ كەزەكتى ءسامميتى تابىستى وتەتىنىنە سەنىم ءبىلدىردى. سونداي-اق رەسەي پرەزيدەنتىنىڭ قازاقستانعا مەملەكەتتىك ساپارى ساياسي جانە تاريحي تۇرعىدان ماڭىزدى ۋاقيعا بولاتىنىنا نازار اۋداردى.
ۆلاديمير پۋتين قاسىم-جومارت توقاەۆتىڭ ەكى مەملەكەت اراسىنداعى قارىم-قاتىناستى دامىتۋعا ەلەۋلى ۇلەس قوسىپ وتىرعانىن جەتكىزدى.
– شىن مانىندە, بۇل قوس حالىق پەن ءبىز ءۇشىن ەڭ باستى مەرەكە دەۋگە بولادى. ءسىزدىڭ ماسكەۋگە كەلۋگە ۋاقىت تاۋىپ, وسى كۇندەرى بىزبەن بىرگە بولعانىڭىز رەسەي فەدەراتسياسى مەن قازاقستان اراسىنداعى ىنتىماقتاستىقتىڭ قانداي دەڭگەيدە ەكەنىن ناقتى كورسەتەدى. مۇنىڭ بارلىعى, كوپ جاعدايدا ءسىزدىڭ مەملەكەتارالىق بايلانىستاردىڭ دامۋىنا قوسقان ۇلەسىڭىزدىڭ ارقاسىندا جۇزەگە اسىپ جاتىر, – دەدى رەسەي پرەزيدەنتى.
كەزدەسۋ بارىسىندا مەملەكەتتەر باسشىلارى وڭىرلىك جانە حالىقارالىق ماسەلەلەر جونىندە پىكىر الماستى.
