جاڭا باستامانىڭ باستى ماقساتى – شاعىن قالالار, اۋدان ورتالىقتارى مەن اۋىلدارداعى كاسىپكەرلەرگە مەملەكەتتىك باعدارلامالار تۋرالى ءتۇسىندىرۋ جۇمىستارىن جۇرگىزۋ, سونداي-اق سول جەردە ءوتىنىم قابىلداۋ ارقىلى قولداۋ الۋ ۇدەرىسىن جەڭىلدەتۋ.
جوبا اياسىندا قور ماماندارى جەرگىلىكتى جەرلەرگە شىعىپ, كاسىپكەرلەرمەن تىكەلەي كەزدەسەدى. بۇل جۇمىسقا اكىمدىكتەر, «اتامەكەن» ۇلتتىق كاسىپكەرلەر پالاتاسى جانە ەكىنشى دەڭگەيلى بانكتەردىڭ وكىلدەرى دە تارتىلادى. ءموبيلدى توپتار اسىرەسە مونوقالالار, اۋدان ورتالىقتارى مەن اۋىلدىق ەلدى مەكەندەردى قامتيدى.
جوبا وڭىرلەردە جۇزەگە اسىرىلىپ جاتقان «ىسكەر ايماق» باعدارلاماسىمەن دە ساباقتاس. ونىڭ ماقساتى – جەرگىلىكتى شيكىزاتتى وڭدەۋ ارقىلى وڭىرلىك الەۋەتتى ناقتى وندىرىستىك جوبالارعا اينالدىرۋ جانە اۋىل كاسىپكەرلەرىنىڭ بەلسەندىلىگىن ارتتىرۋ.
ءموبيلدى فرونت-وفيستەر اياسىندا كاسىپكەرلەر تەك «دامۋ قورى» قىزمەتىمەن عانا شەكتەلمەيدى. «بايتەرەك» حولدينگىنىڭ بىرىڭعاي فرونت-ءوفيسى ارقىلى «قازاقستاننىڭ دامۋ بانكى», «ونەركاسىپتى دامىتۋ قورى», «ەكسپورتتىق-كرەديتتىك اگەنتتىك» جانە «Qazaqstan Investment Corporation» ۇسىناتىن قولداۋ قۇرالدارى تۋرالى دا كەڭەس الۋعا بولادى.
ولاردىڭ قاتارىندا نەسيە مولشەرلەمەسىن سۋبسيديالاۋ, كەپىلدىك بەرۋ, جەڭىلدەتىلگەن نەسيەلەۋ, ليزينگتىك قارجىلاندىرۋ, ميكروقارجىلاندىرۋ, ەكسپورتتىق جوبالاردى قولداۋ, وڭدەۋ سالاسىن دامىتۋ, سونداي-اق وقىتۋ مەن كەڭەس بەرۋ سەكىلدى قارجىلاي جانە قارجىلاي ەمەس قولداۋ تەتىكتەرى بار.
ءموبيلدى فرونت-وفيستەر «قازاقستان» بويىنشا 17 وڭىردە جۇمىس ىستەيدى. الايدا «استانا», «الماتى» جانە «شىمكەنت» بۇل تىزىمگە كىرمەيدى. ساپارلار ارنايى بەكىتىلگەن كەستە بويىنشا اپتا سايىن ۇيىمداستىرىلادى, ال كاسىپكەرلىك بەلسەندىلىك جوعارى ايماقتاردا ولاردىڭ جيىلىگى ارتۋى مۇمكىن.
جوبانىڭ نەگىزگى ناتيجەسى – اۋىل مەن قالا اراسىنداعى گەوگرافيالىق الشاقتىقتى ازايتىپ, مەملەكەتتىك قولداۋ قۇرالدارىن بارشا كاسىپكەرگە تەڭ دارەجەدە ۇسىنۋ. وسىلايشا اۋىلداعى بيزنەس وكىلدەرى دە ءىرى قالالارداعى كاسىپكەرلەرمەن بىردەي مۇمكىندىكتەرگە يە بولادى. بۇل ەل اۋماعىندا كاسىپكەرلىكتىڭ تەڭگەرىمدى دامۋىنا جول اشادى.
