تجم مالىمەتىنشە, الماتى وبلىسىندا «كولساي كولدەرى» ۇلتتىق پاركىنىڭ اۋماعىندا ميكرواۆتوبۋس ەڭىستەن سىرعىپ كەتىپ, شامامەن 150 مەترگە تومەن قۇلاپ تۇسكەن.
جاقىن ماڭدا گيدروبەكەت سالۋ جۇمىستارىن جۇرگىزىپ جاتقان «قازسەلدەنقورعاۋ» قىزمەتكەرلەرى وقيعاعا جەدەل ارالاسقان.
«الماتى وبلىسى تجد كۇشتەرىمەن بىرلەسىپ, كولىك قۇرالى قولجەتىمسىز اۋماقتان ءساتتى شىعارىلدى. زارداپ شەككەندەر جوق. قۇتقارۋشىلار تاۋلى جەرلەردە قوزعالۋ كەزىندە قاۋىپسىزدىك شارالارىن ساقتاۋ قاجەتتىگىن ەسكە سالادى», دەلىنگەن تجم حابارلاماسىندا.
