پرەزيدەنت قازاقستاندا سوڭعى جىلدارى كوپ وزگەرىس بولعانىن, بۇل كوزگە كورىنىپ تۇرعانىن اتاپ ءوتتى
«قالالارىمىز بەن اۋىلدارىمىز تازارىپ, توپىراقتىڭ, سۋدىڭ, اۋانىڭ لاستانۋى ازايا ءتۇستى. ءىرى كاسىپورىنداردا زياندى شىعارىندىلاردى تومەندەتۋ باعىتىندا جۇمىس اتقارىلىپ, ۇزدىك ەكولوگيالىق تاجىريبەلەر ەنگىزىلۋدە, قاتتى قالدىقتاردى قايتا وڭدەۋ ىسىندە العا ىلگەرىلەۋ بار. الايدا كەمشىلىكتەر دە از ەمەس, الدا جۇمىس كوپ. ەڭ باستىسى, ەكونوميكا عانا ەمەس, ازاماتتارىمىزدىڭ تۇرمىس سالتى مەن وي-ساناسى دا وزگەرۋدە. جاڭا كونستيتۋتسيامىزدا جاسامپاز پاتريوتيزم, بىرلىك, ىنتىماق, تابيعاتتى ايالاۋ قاعيداتتارى تىرشىلىكتىڭ نەگىزگى ىرگەتاسى رەتىندە بەكىتىلدى. بۇعان بەلگىلى دارەجەدە «تازا قازاقستان» جوباسىنىڭ, ياعني, ەل جاستارىنىڭ اسەرى بولعانى راس. مەن وزدەرىڭىزدى ماقتان تۇتامىن. سىزدەرگە العىسىم شەكسىز», دەدى پرەزيدەنت.
پرەزيدەنت: تازالىق ۇعىمى قوعامدىق ءمانى زور قۇندىلىققا اينالىپ جاتىر
مەملەكەت باسشىسى ەكى جىلدا اتالعان پروگرەسسيۆتى باستاما جالپىۇلتتىق قوزعالىسقا اينالعانىن اتاپ ءوتتى.
«جوبا تىڭ مازمۇنمەن تولىعىپ, شىن مانىندە, ادىلەتتى قازاقستان يدەياسىنىڭ وزەگىنە اينالىپ كەلەدى. «تازا قازاقستان» قاعيداتى, «زاڭ جانە ءتارتىپ», «ادال ازامات» تۇجىرىمدامالارى تۇتاس قۇندىلىقتار جۇيەسىن قۇراپ, مەملەكەتتىك باسقارۋ مەن قوعامنىڭ اجىراماس بولشەگى بولۋعا ءتيىس. مۇنى جان-جاقتى ىلگەرىلەتۋ ءۇشىن بەدەلى بيىك بەلگىلى ازاماتتاردى تارتقان دۇرىس. جاڭا يدەولوگيانىڭ باستى دارىپتەۋشىسى – جاستار», دەدى قاسىم-جومارت توقاەۆ.
ەكولوگيا ماسەلەسىن ەشقانداي ەل جالعىز شەشە المايدى: پرەزيدەنت جاستارعا تاريحي ميسسيا جۇكتەدى
