فوتو: اشىق دەرەككوز
پروكۋراتۋرا جۇرگىزگەن تالداۋ كورسەتكەندەي, بەكىرە تۇقىمداس بالىقتاردى زاڭسىز اۋلاۋ دەڭگەيىنىڭ جوعارى بولۋىنا تىكەلەي تۇتىنۋشىلىق سۇرانىس سەبەپ بولىپ وتىر. ياعني, براكونەرلىك ونىمدەردى ساتىپ الاتىن ازاماتتار بۇل قىلمىستىڭ جاناما ىنتالاندىرۋشىسىنا اينالىپ وتىر.
2025 جىلدىڭ قورىتىندىسى بويىنشا وبلىستا ەكولوگيا سالاسىندا 30 قۇقىق بۇزۋشىلىق تىركەلگەن. وتكەن جىلى سوتتارعا ايىپتاۋ اكتىسىمەن 11 قىلمىستىق ءىس جولدانىپ, 10 تۇلعاعا قاتىستى ايىپتاۋ ۇكىمى شىقتى.
پروكۋراتۋرا مىناداي ماڭىزدى قۇقىقتىق ەسكەرتۋدى قاپەرگە سالادى: قىلمىستىق كودەكستىڭ 339 جانە 339-1-باپتارىنا سايكەس, تەك بالىقتى اۋلاعان براكونەرلەر عانا ەمەس, سونىمەن قاتار:
- زاڭسىز ساتىپ الۋشىلار;
- ساقتاۋشىلار مەن تاسىمالداۋشىلار;
- وتكىزۋشىلەر (قايتا ساتۋشىلار) دە قىلمىستىق جاۋاپكەرشىلىككە تارتىلادى.
بيىل اتىراۋ قالاسىنىڭ تۇرعىنىنا قاتىستى شىققان سوت ۇكىمى بۇل ەسكەرتۋدىڭ ناقتى دالەلى بولدى. تەكسەرۋ كەزىندە ونىڭ اۆتوكولىگىنەن 501,9 كگ بەكىرە تۇقىمداس بالىق تابىلدى. سوتتىڭ شەشىمىمەن ول 7 جىل مەرزىمگە باس بوستاندىعىنان ايىرىلىپ, مەملەكەتكە كەلتىرىلگەن ماتەريالدىق شىعىن مەن باج سالىعى ەسەبىنە 304 ملن تەڭگەدەن استام قاراجاتتى وتەۋگە مىندەتتەلدى.
اقتاۋدا 40 كەلى قىزىل بالىقتى زاڭسىز تاسىمالداعان كۇدىكتى ۇستالدى
اتىراۋ وبلىسىنىڭ پروكۋراتۋراسى زاڭدى بىلمەۋ جاۋاپكەرشىلىكتەن بوساتپايتىنىن ەسكە سالادى. جەكە تۇلعالاردان ءتيىستى رۇقسات قۇجاتتارىنسىز, شىعۋ تەگى كۇماندى بالىق پەن ۋىلدىرىقتى ساتىپ الۋ ارقىلى ءسىز اۋىر قىلمىستىڭ سىبايلاسىنا اينالاسىز.
