فوتو: قورعانىس مينيسترلىگى
اتالعان مەرەكە حالىقارالىق داستۇرگە نەگىزدەلگەن. ول يۋنەسكو باستاماسىمەن بەكىتىلىپ, الەمدە دۇنيەجۇزىلىك كىتاپ جانە اۆتورلىق قۇقىق كۇنى رەتىندە اتالىپ وتەدى. قازاقستاندا بۇل داتا مەملەكەت باسشىسىنىڭ تاپسىرماسىمەن ەنگىزىلىپ, العاش رەت 2025 جىلى مادەني-اعارتۋشىلىق كۇن رەتىندە بەلگىلەندى.
قارۋلى كۇشتەردە كىتاپ وقۋ مادەنيەتىن دامىتۋ جۇيەلى تۇردە جۇزەگە اسىرىلىپ كەلەدى. قازىرگى تاڭدا اسكەري بولىمدەر مەن مەكەمەلەردە 322 كىتاپحانا جۇمىس ىستەيدى. ولاردىڭ قورىندا 52 مىڭنان استام كوركەم ادەبيەت جانە 198 مىڭنان اسا وقۋ باسىلىمى بار.
ۇلتتىق اسكەري-پاتريوتتىق ورتالىعى اسكەري-عىلىمي كىتاپحاناسىنىڭ مەڭگەرۋشىسى وكسانا ءالجانوۆانىڭ ايتۋىنشا, كىتاپحانا قورىندا وتاندىق اۆتورلارمەن قاتار اسكەري جازۋشىلار مەن عالىمداردىڭ قۇندى ەڭبەكتەرى جيناقتالعان. كىتاپحانا 2020 جىلدىڭ جەلتوقسانىندا اشىلعان, بۇگىندە وندا 7 مىڭنان استام كىتاپ بار. قور نەگىزىنەن قايىرىمدىلىق اكتسيالارى مەن ارىپتەس كىتاپحانالاردىڭ قولداۋى ارقىلى تولىقتىرىلعان.
تەك بيىلدىڭ وزىندە اسكەري قىزمەتشىلەرگە 48 مىڭنان استام كىتاپ بەرىلگەن. بۇل ساربازدار اراسىندا كىتاپ وقۋعا دەگەن قىزىعۋشىلىقتىڭ جوعارى ەكەنىن كورسەتەدى.
كىتاپحانا قورى تۇراقتى تۇردە جاڭارتىلىپ وتىرادى. بۇل ىسكە دەمەۋشىلەر, باسپالار جانە اسكەري قىزمەتشىلەردىڭ وزدەرى دە بەلسەندى اتسالىسادى. كوپتەگەن ساربازدار جەكە كىتاپتارىن ءبولىم كىتاپحانالارىنا تابىستاپ, ورتاق ىسكە ۇلەس قوسىپ كەلەدى.
مىندەتتى وقۋ نورماسىن ەنگىزۋ – تەك تالاپ ەمەس, تاربيەلىك ءارى ءبىلىم بەرۋ جۇمىسىنىڭ ءبىر بولىگى. كىتاپ وقۋ وي-ءورىستى كەڭەيتىپ, سىني ويلاۋدى دامىتادى جانە تۇلعالىق قۇندىلىقتاردى قالىپتاستىرادى.
ۇلتتىق اسكەري-پاتريوتتىق ورتالىعىنىڭ ساربازى نۇردوس ايتمۇحامەتوۆتىڭ ايتۋىنشا, اسكەري كىتاپحانادا قىزىقتى ەڭبەكتەر كوپ. قازىر ول اقىن مۇحتار شاحانوۆتىڭ شىعارماسىن وقىپ ءجۇر. جالپى, وعان دەتەكتيۆ جانرى مەن اسكەري تاقىرىپتاعى كىتاپتار ۇنايدى.
ايدا بالاەۆا: كىتاپ وقۋعا قىزىعۋشىلىق تۇراقتى تۇردە ارتىپ كەلەدى
قازىرگى تاڭدا كىتاپ – ءوزىن-ءوزى دامىتۋعا مۇمكىندىك بەرەتىن ماڭىزدى قۇرال. ال وعان دەگەن قىزىعۋشىلىق اسكەري قىزمەتشىلەردىڭ كاسىبي ءارى تۇلعالىق ءوسۋىنىڭ اجىراماس بولىگىنە اينالىپ كەلەدى.
