بۇعان دەيىن, 2013 جىلعا دەيىن, ەلدەگى زەينەتاقى قاراجاتى جەكە جيناقتاۋشى قورلاردا بولعان. الايدا ول كەزەڭدە بىرقاتار قوردىڭ بانكروتقا ۇشىراۋىنا بايلانىستى ازاماتتار قارجى جوعالتقان جاعدايلار تىركەلگەن. وسىدان كەيىن بارلىق زەينەتاقى اكتيۆتەرى بىرىڭعاي جيناقتاۋشى زەينەتاقى قورىنا بىرىكتىرىلدى.
2021 جىلدان باستاپ ازاماتتارعا ءوز جيناقتارىنىڭ ءبىر بولىگىن جەكە باسقارۋشى كومپانيالارعا سەنىپ تاپسىرۋ مۇمكىندىگى قايتا بەرىلدى. ال 2023 جىلى بۇل شەكتەۋ كەڭەيتىلىپ, جيناقتاردىڭ 50%-نا دەيىن جەكە باسقارۋعا بەرۋ قۇقىعى قاراستىرىلدى.
مينيستر: زەينەتاقى شەگىنە قاتىستى وزگەرىستەر الداعى ايدا بەكىتىلۋى مۇمكىن
ۇلتتىق بانك توراعاسىنىڭ ورىنباسارى ءاليا مولدابەكوۆانىڭ ايتۋىنشا, قازىرگى تاڭدا نارىقتا 5 جەكە باسقارۋشى كومپانيا جۇمىس ىستەيدى. ولارعا شامامەن 100 ملرد تەڭگە زەينەتاقى اكتيۆتەرى سەنىپ تاپسىرىلعان. ال ۇلتتىق بانكتىڭ باسقارۋىنداعى اكتيۆتەر كولەمى 25 ترلن تەڭگەدەن اسادى.
ونىڭ سوزىنشە, جەكە باسقارۋشىلارعا قاتاڭ تالاپتار قويىلعان. اتاپ ايتقاندا, ولاردىڭ ەڭ تومەنگى مەنشىكتى كاپيتالى كەمىندە 1,7 ملرد تەڭگەنى قۇراۋى ءتيىس. سونىمەن قاتار, ولاردى باقىلاۋ جانە رەتتەۋ ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگى تاراپىنان جۇزەگە اسىرىلادى.
ازاماتتاردىڭ قاراجاتىن قورعاۋ ماقساتىندا ارنايى وتەماقى تەتىگى دە قاراستىرىلعان: ەگەر جەكە كومپانيانىڭ تابىستىلىعى نارىقتىق ورتاشا كورسەتكىشتەن تومەن بولسا, ايىرماشىلىقتى وتەۋ مىندەتتەلەدى.
مامانداردىڭ ايتۋىنشا, جەكە باسقارۋشى كومپانيالار كەي جاعدايدا ۇلتتىق بانككە قاراعاندا جوعارى تابىس كورسەتىپ وتىر. سەبەبى ورتالىق بانك زەينەتاقى اكتيۆتەرىن بارىنشا كونسەرۆاتيۆتى ستراتەگيامەن باسقارادى.
قازىرگى ۋاقىتتا رەتتەۋشى ورگاندار ازاماتتاردىڭ بۇل قۇرالعا قىزىعۋشىلىعىن ارتتىرۋ جانە ينۆەستيتسيالىق مۇمكىندىكتەردى كەڭەيتۋ بويىنشا قوسىمشا شارالاردى قاراستىرىپ جاتىر.
