فوتو: Depositphotos
قارجىلىق مونيتورينگ اگەنتتىگىنىڭ سولتۇستىك قازاقستان وبلىسى بويىنشا دەپارتامەنتىنىڭ مالىمەتىنشە, 2023 جىلدىڭ تامىزىندا پەتروپاۆل قالاسى اكىمدىگىنىڭ «تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمى» كمم مەن «BUKA» جشس اراسىندا جالپى قۇنى 5,4 ملرد تەڭگەگە اۆتوجول وتپەجولىن سالۋ تۋرالى كەلىسىمشارت جاسالعان.
ءىرى كولەمدە قارجى جىمقىرعان قۇرىلىس كومپانياسىنىڭ باسشىسى رەسەيدەن ەكستراديتسيالاندى
الايدا جوبانى ىسكە اسىرۋ بارىسىندا مەردىگەر ۇيىم جۇمىس كەستەسىنەن جۇيەلى تۇردە كەشىگىپ وتىرعان. تەرگەۋ بارىسىندا انىقتالعانداي, كومپانيا ديرەكتورى تاپسىرىس بەرۋشى تاراپتىڭ لاۋازىمدى تۇلعالارىمەن ءسوز بايلاسىپ, ناقتى ورىندالماعان جۇمىستاردى ورىندالدى دەپ كورسەتەتىن جالعان اكتىلەردى راسىمدەگەن.
سول قۇجاتتاردىڭ نەگىزىندە مەردىگەردىڭ ەسەپشوتىنا بيۋدجەت قاراجاتى نەگىزسىز اۋدارىلعان. سونىڭ سالدارىنان مەملەكەتكە 2 ملرد تەڭگەدەن استام زالال كەلتىرىلگەن.
سوت سانكتسياسىمەن جالپى قۇنى 270 ملن تەڭگەدەن اساتىن 24 اۆتوكولىك پەن ارنايى تەحنيكاعا تىيىم سالىندى. سونىمەن قاتار كۇدىكتىگە قاتىستى قاماۋدا ۇستاۋ تۇرىندەگى بۇلتارتپاۋ شاراسى قولدانىلدى.
قازىرگى ۋاقىتتا تەرگەپ-تەكسەرۋ جالعاسىپ جاتىر. قىلمىستىق-پروتسەستىك كودەكستىڭ 201-بابىنا سايكەس, وزگە مالىمەتتەر جاريالاۋعا جاتپايدى.
استانادا جەدەل جاردەم ستانتسياسىنىڭ قىزمەتكەرلەرى جىلدار بويى قارجى جىمقىرعان
