اتالعان تازالىق جۇمىستارى مەن تال ەگۋگە مەملەكەتتىك مەكەمەلەر, جەكە ۇيىمدار مەن ءدىني بىرلەستىكتەردىڭ مۇشەلەرى, جاستار, ۆولونتەرلىك جانە ۇكىمەتتىك ەمەس ۇيىمدار, سونداي-اق ەكو بەلسەندىلەر قاتىستى. اتالعان اۋقىمدى سەنبىلىكتە وبلىس اكىمىنىڭ ورىنباسارى عاني مايلىباەۆ تازالىق اكتسياسىنىڭ تاعىلىمدى شارا ەكەنىن ەسكە سالدى.
«تابيعاتى تاڭعاجايىپ ىلە وزەنىنىڭ جاعاسىنداعى «كوشپەندىلەر» قالاشىعى الدا كورنەكتى تۋريستىك نىسانعا اينالماق. سوندىقتان بۇلا اۋماقتا كەلۋشىلەرگە جايلى ورتا جاساۋ ءۇشىن مۇندا ەكوپارك سالىنباق. بۇل قادام ءوڭىرىمىزدىڭ تۋريستىك الەۋەتىنە تىڭ سەرپىن بەرەدى دەپ ويلايمىن. بۇگىن سول يگى باستاماعا ءۇن قوسۋ ءۇشىن جينالدىق», دەدى عاني ايدار ۇلى.
300-گە جۋىق ادام قاتىسقان شارادا «كوشپەندىلەر» قالاشىعى ماڭىنا 500 ءتۇپ اعاش ەگىلىپ, ىلە وزەنىنىڭ بويى تازالاندى. ەكولوگيالىق اكتسياعا قاتىسۋشىلار تابيعاتتى ايالاپ, قورشاعان ورتانى تازا ۇستاۋ – ادام بالاسىنا جۇكتەلگەن مىندەت ەكەنىن ايتتى.
وبلىس اكىمدىگىنىڭ مالىمەتىنە سۇيەنەر بولساق, ايماق اۋماعىنداعى سەنبىلىككە 32000-عا جۋىق ادام قاتىسىپ, 225 تەحنيكا جۇمىلدىرىلدى. سەنبىلىك قورىتىندىسى بويىنشا 264 توننا قوقىس شىعارىلىپ, 17800 ءتۇپ اعاش وتىرعىزىلدى.
