دەمالىس كۇندەرى رەسپۋبليكا بويىنشا كىتاپحانالار, مادەنيەت وشاقتارى مەن ءبىلىم بەرۋ ۇيىمدارى ناعىز رۋحاني ورتالىقتارعا اينالماق. باعدارلاما اياسىندا اشىق اسپان استىندا كىتاپ وقۋ الاڭدارى, شىعارمالار نەگىزىندە تۇسىرىلگەن فيلمدەردىڭ كورسەتىلىمى, كىتاپ كلۋبتارىنىڭ باسقوسۋلارى مەن بۇلدىرشىندەرگە ارنالعان ءتۇرلى تانىمدىق جوبالار ۇيىمداستىرىلادى.
اباي وبلىسىندا بالالارعا ارنالعان «كىتاپ وقۋ الاڭدارى» اكتسياسى مەن «دەمالىس پەن كىتاپ – شابىت ۇندەستىگى» اتتى پوەزيا كەشى وتەدى.
اقمولا وبلىسىندا «مەن الەمدى كىتاپ ارقىلى بىلەمىن» ادەبي كەشى مەن «Quiz book: ءبىلىم بايگەسى» زياتكەرلىك ويىنى جوسپارلانعان.
اقتوبە وبلىسىندا «كىتاپ – ترەندتە!» اتتى ادەبي-تانىمدىق كەش وتكىزىلەدى.
باتىس قازاقستان وبلىسىندا وقۋشىلار ءۇشىن «كىتاپ كەيىپكەرلەرى سويلەيدى» اتتى ەرەكشە فورماتتاعى شارا ۇيىمداستىرىلماق.
جەتىسۋ وبلىسىندا «اقىندار مۇراسى» پوەزيا كەشى مەن زياتكەرلىك سايىستار وتەدى.
قىزىلوردا وبلىسىندا «كىتاپ – سارقىلماس قازىنا» اتتى اۋقىمدى وقۋ مارافونى ءوز مارەسىنە جەتپەك.
مينيسترلىكتىڭ ءباسپاسوز قىزمەتى حابارلاعانداي, بۇل جوبالاردىڭ بارلىعى قوعامنىڭ زياتكەرلىك الەۋەتىن ارتتىرۋعا جانە كىتاپتىڭ ادام ومىرىندەگى ءرولىن ايشىقتاۋعا نەگىزدەلگەن.
