سۋرەت: senate.parlam.kz
كوشپەلى وتىرىس بارىسىندا گيدروتەحنيكالىق قۇرىلىستىڭ جاي-كۇيىنە, سونداي-اق كوپىرلەردى, بوگەتتەر مەن توننەلدەردى ىقتيمال قاۋىپ-قاتەرلەر مەن توتەنشە جاعدايلاردان قورعاۋ ماسەلەلەرىنە باسا نازار اۋدارىلدى. قاتىسۋشىلار نىساننىڭ اعىمداعى پايدالانىلۋ بارىسىمەن, ونىڭ تەحنيكالىق سيپاتتامالارىمەن, تۇراقتى جۇمىس ىستەۋىن قامتاماسىز ەتۋ بارىسىندا قابىلدانىپ جاتقان شارالارمەن تانىستى.
كوميتەت توراعاسى اندرەي لۋكين اسا ماڭىزدى ينفراقۇرىلىم نىساندارىنىڭ قاۋىپسىزدىگىن قامتاماسىز ەتۋ ماسەلەلەرى تۇراقتى باقىلاۋدا ەكەنىن اتاپ ءوتتى.
«گيدروتەحنيكالىق قۇرىلىستاردىڭ جاي-كۇيىنە جانە توتەنشە جاعدايلاردىڭ, سونىڭ ىشىندە سۋ تاسقىنى كەزەڭىندەگى قاۋىپتەردىڭ الدىن الۋ شارالارىنا ەرەكشە كوڭىل ءبولۋ ماڭىزدى. بۇل رەتتە مۇنداي نىسانداردىڭ توزۋ دەڭگەيىنىڭ جوعارى ەكەنىن ەسكەرە وتىرىپ, ولاردى جاڭعىرتۋ مەن جوندەۋگە جۇيەلى ءتاسىلدى قامتاماسىز ەتۋ قاجەت. ۆەدومستۆوارالىق ءتيىمدى ءىس-قيمىلدى جولعا قويۋ جانە تۋىندايتىن تاۋەكەلدەرگە جەدەل دەن قويۋعا, ماڭىزدى ينفراقۇرىلىمنىڭ تۇراقتى جۇمىسىن قامتاماسىز ەتۋگە مۇمكىندىك بەرەتىن زاماناۋي مونيتورينگ مەحانيزمدەرىن ەنگىزۋدىڭ ماڭىزى زور», دەدى ول.
سونداي-اق تالقىلاۋ بارىسىندا سۋ تاسقىنى جاعدايى جانە توتەنشە جاعدايدىڭ الدىن الۋ بويىنشا قابىلدانىپ جاتقان شارالار قارالدى. قازىرگى ۋاقىتتا ەلىمىزدە گيدرولوگيالىق جاعدايعا تۇراقتى مونيتورينگ جۇرگىزىلىپ جاتىر, ال سۋ تاسقىنىنا قارسى ءىس-شارالار ۋاكىلەتتى ورگانداردىڭ باقىلاۋىندا.
كوشپەلى جيىنعا توتەنشە جاعدايلار, سۋ رەسۋرستارى جانە يرريگاتسيا مينيسترلىكتەرىنىڭ, استانا قالاسى اكىمدىگىنىڭ, باسقا دا مۇددەلى مەملەكەتتىك ورگانداردىڭ وكىلدەرى قاتىستى.
كەزدەسۋ قورىتىندىسىندا ماڭىزدى ينفراقۇرىلىم قاۋىپسىزدىگىن قامتاماسىز ەتۋ جۇيەسىن ودان ءارى جەتىلدىرۋ, سونىڭ ىشىندە ۆەدومستۆوارالىق ءىس-قيمىل مەحانيزمدەرىن دامىتۋ, الدىن الۋ شارالارىن كۇشەيتۋ قاجەتتىگى اتاپ ءوتىلدى.
