شەبەر ءدال وسى ۇلگىدە ءۇش دومبىرا جاساپ, ونىڭ ءبىرىن وزبەكالى جانىبەكوۆكە, ەكىنشىسىن سازگەر توكەن ەلتەباەۆقا بەرگەن. ءۇشىنشىسى مۋزەي قورىندا ساقتاۋلى.
قوبىزعا ۇقسايتىن دومبىرا مۇراجايعا 1975 جىلى 30 ناۋرىزدا تاپسىرىلىپتى.
«شاناعى سەگىزدىك فورمادا جاسالعان بۇل دومبىرا ءبىر قاراعاندا قوبىزعا ۇقسايدى. توكەي اعامىز – دومبىرامەن قاتار قوبىز جاساعان كىسى. ارقالىقتان ۇلتتىق اسپاپتار تسەحىن اشامىن دەپ ءجۇرىپ ومىردەن وتكەن. جالپى, بىزدە تۇرعان دومبىرانىڭ شاناعى اعاشتان بۇتىندەي شابىلىپ جاسالعان. اسپاپتىڭ دوڭگەلەنىپ كەلگەن ارتقى جاعى ارقانىڭ قالاق دومبىرالارى ءتارىزدى تەگىس شابىلعان. ال ونىڭ ءۇش بۇرىشقا ۇقسايتىن جوعارى جاعى قىرلى بولىپ كەلەدى. نەگىزى, ەكسپەريمەنت تۇرىندە جاسالعان اسپاپ بولسا كەرەك. مىسالى, ارقادا قالاق دومبىرا, كەڭ ساعاقتى, قۋىس مويىن دومبىرالار ەكى-ءۇش ۇلگىدەن كەزدەسەدى. ال بۇل دومبىرانىڭ باسقا ءتۇرىن كەزدەستىرمەدىم. سوندىقتان شەبەر مۇنى تاجىريبە ءۇشىن جاساپ كورگەن بولۋى كەرەك دەپ ويلايمىن. بىراق دومبىرا قاڭسىپ تۇرىپ قالعانى بولماسا, سويلەپ تۇر», دەيدى مۋزەي ديرەكتورىنىڭ ورىنباسارى باتىرلان ساعىنتاەۆ.
قوستاناي وبلىسى
