قىتايدا جول اپاتىنان ەلىمىزدىڭ 2 ازاماتى قازا تاپتى

استانا. 27 ناۋرىز. قىتايدا قازاقستان ازاماتتارى مىنگەن اۆتوبۋس اپاتقا ۇشىراپ, 2 ادام مەرت بولدى. بۇل تۋرالى mail.ru حابارلادى. بۇدان بولەك, اۆتوبۋستاعى 19 ازامات ءتۇرلى جاراقاتپەن اۋرۋحاناعا جەتكىزىلگەن. بۇلاردىڭ اراسىنداعى 6 ادامنىڭ جاعدايى اۋىر. جاپا شەككەندەردىڭ دەنى قازاقستان ازاماتتارى. جول-كولىك وقيعاسى قىتاي جەرىندە ورىن العان. اۆتوبۋس وسى ەلدىڭ كومپانياسىنا تيەسىلى. كۋاگەرلەردىڭ سوزىنشە, اۆتوبۋس جولدىڭ قارسى بەتىنە شىعىپ, جەڭىل ماشينامەن سوقتىعىسقان. ەكى وتانداسىمىز سول جەردە قازا تاپقان. ال 19 ادام زيمۋناي ەلدى مەكەنىندەگى اۋرۋحاناعا جاتقىزىلدى. اراسىندا قىتايدا ءبىلىم الىپ جۇرگەن ستۋدەنتتەر دە بار كورىنەدى. زارداپ شەككەندەر اۆتوبۋس يەلەرىنىڭ ارەكەتىنە نارازى. ايتۋلارىنشا, كولىك كومپانياسىنىڭ وكىلى ەشبىر اۋدارماشىسىز الدەبىر قۇجاتتارعا جولاۋشىلاردىڭ قولىن قويعىزباق بولىپ ءجۇر ەكەن. سەمەي قالاسىنىڭ تۇرعىنى, جول اپاتىنان زارداپ شەگىۋشى قۇرمانگۇل ورازباەۆا: «كۇندە ءبىر قاعازداردى الىپ كەلىپ قول قويىڭدار دەپ مەزى ەتتى. قىتاي ءتىلىن شالا-شارپى بىلەتىن بىرەۋ وقىپ ەدى, وندا «بار جاۋاپكەرشىلىك جولاۋشىلارعا جۇكتەلەدى» دەپ جازىلعان ەكەن. ءبىزدىڭ ۇكىمەت تاراپىنان جاردەم بولسا دەيمىز. اۋدارماشى مەن زاڭگەردىڭ كومەگى كەرەك», دەيدى. ايتا كەتەيىك, اۆتوبۋس سەمەيدەن ۇرىمشىگە باعىت العان ەكەن. جولدىباي بازار. دەرەك, سۋرەت: mail.ru.