گولوۆكين: مونرودان كەيىنگى قارسىلاسىم كوتتو بولۋى مۇمكىن

استانا. 27 ناۋرىز. كاسىپقوي بوكستان WBA (Super), WBC (Interim) جانە IBO تۇجىرىمدارى بويىنشا الەم چەمپيونى گەننادي گولوۆكين NBC Sports راديوسىنا سۇحبات بەردى. اڭگىمە بارىسىندا ول ۆيللي مونرومەن بولاتىن جەكپە-جەك تۋرالى جانە بولاشاقتاعى قارسىلاستارى جايىندا ايتتى. بۇل تۋرالى بوكسشىنىڭ ۆكونتاكتە الەۋمەتتىك جەلىسىندەگى رەسمي توبى حابارلادى. «مەن قارسىلاستارىمدى ءارتۇرلى ءادىس-تاسىلمەن ۇرىپ قۇلاتقىم كەلەدى. 12 راۋندتىق جەكپە-جەك وتكىزسەم, ءتىپتى قىزىق بولار ەدى. مونرو تۋرالى ايتار بولسام, ول وسىعان دەيىنگى قارسىلاستارىمنىڭ ىشىندەگى ءتاسىلى وزگەشە بوكسشى. سوندىقتان 16 مامىردا بوكسسۇيەر قاۋىم تاماشا شوۋدىڭ كۋاسى بولارىنا سەنىمىم مول», – دەدى بوكسشى. سونداي-اق, ول مونرودان كەيىن ميگەل كوتتومەن كەزدەسۋ ءۇشىن ارەكەت ەتەتىنىن تىلگە تيەك ەتتى. ءسوزىنىڭ سوڭىندا وتانداسىمىز امەريكالىق فلويد مەيۆەزەرمەن جۇدىرىقتاسقىسى كەلەتىنىن تاعى ءبىر ايتىپ ءوتتى. بۇل جونىندە گولوۆكين: «قازىر فلويدقا قارسى شارشى الاڭعا شىعۋ ارمان بولىپ تۇر. ونىمەن كەزدەسۋ ءۇشىن جەڭىل سالماققا وتۋگە دە دايىنمىن», – دەدى. ايتا كەتەيىك, 16 مامىردا گەننادي گولوۆكين كەزەكتى رەت چەمپيوندىق اتاعىن قورعاۋ ءۇشىن ۆيللي مونرومەن ايقاسقا تۇسەدى. بۇل جەكپە-جەكتى HBO تەلەارناسى تىكەلەي ەفيردە كورسەتۋدى جوسپارلاۋدا. ەلامان قوڭىر. دەرەك: ۆكونتاكتە. سۋرەت: boxingplanet.ru.