سينوپتيكتەردىڭ مالىمەتىنشە, ەل وڭىرلەرىندە تۇمان, نايزاعاي, قاتتى جەل بولجانسا, شىعىس پەن ورتالىق ايماقتاردا سۋ دەڭگەيىنىڭ كوتەرىلۋى مەن سۋ باسۋ قاۋپى بار.
نايزاعاي, جاڭبىر جانە قاتتى جەل
باتىس وڭىرلەردە اۋا رايى تۇراقسىز بولادى. اتىراۋ جانە ماڭعىستاۋ وبلىستارىندا جاڭبىر مەن نايزاعاي كۇتىلەدى, كەي جەرلەردە نوسەر بولۋى مۇمكىن. جەلدىڭ جىلدامدىعى 15-20 م/س دەيىن كۇشەيەدى.
سونداي-اق ەكپىندى جەل اقتوبە وبلىسىندا, ۇلىتاۋ وبلىسىندا, جەتىسۋ جانە الماتى وبلىستارىندا دا بولجانىپ وتىر.
تۇمان بىرنەشە ءوڭىردى قامتيدى
سولتۇستىك, شىعىس جانە ورتالىق ايماقتاردا قالىڭ تۇمان تۇسەدى. اتاپ ايتقاندا, اقمولا, قاراعاندى, قوستاناي, پاۆلودار, سولتۇستىك قازاقستان, شىعىس قازاقستان وبلىستارىندا, سونداي-اق اباي وبلىسىندا جانە كوكشەتاۋ, سەمەي, پاۆلودار, پەتروپاۆل, وسكەمەن قالالارىندا تۇمان بولادى.
وسىعان بايلانىستى تۇنگى جانە تاڭعى ۋاقىتتا جولداعى كورىنۋ دەڭگەيى كۇرت تومەندەيدى.
نەگىزگى قاۋىپ – سۋ تاسقىنى
ەڭ كۇردەلى جاعداي اباي, شىعىس قازاقستان, پاۆلودار جانە قاراعاندى وبلىستارىندا قالىپتاسۋى مۇمكىن.
كۇننىڭ جىلىنۋىنا بايلانىستى قار قارقىندى ەرىپ, وزەندەردە مۇز ءجۇرۋ پروتسەسى باستالىپ, سۋ دەڭگەيى كوتەرىلىپ كەلەدى. سونىڭ سالدارىنان وزەندەردىڭ تاسۋى, جولداردى سۋ باسۋى جانە ەلدى مەكەندەردى سۋ باسۋ قاۋپى بار. كەي جەرلەردە سۋ دەڭگەيى قاۋىپتى شەككە جاقىنداپ قالعان.
ورالداعى جايىق وزەنىندە سۋ دەڭگەيى ءبىر مەترگە دەيىن كوتەرىلدى
وڭتۇستىكتە ءورت قاۋپى جوعارى
تۇركىستان جانە قىزىلوردا وبلىستارىندا, جەتىسۋ وبلىسىنىڭ وڭتۇستىگىندە جانە قوستاناي وبلىسىنىڭ وڭتۇستىگىندە جوعارى ءورت قاۋپى جاريالاندى.
