فوتو: polisia.kz
ىشكى ىستەر مينيسترلىگىنىڭ مالىمەتىنشە, 17 ناۋرىزدا وبلىستىڭ ەلوردا اۋداندارىنىڭ ءبىرىنىڭ پوليتسيا بولىمىنە ازاماتتاردان قاتارىنان ءۇش ءوتىنىش تۇسكەن. ولاردىڭ ايتۋىنشا, وتكەن جىلدىڭ سوڭىندا ءوزىن مەديتسينالىق قىزمەتكەر رەتىندە تانىستىرعان بەلگىسىز تۇلعا اسكەرگە شاقىرۋدان بوساتۋ ءۇشىن «قاجەتتى» دياگنوز قويىپ بەرۋگە ۋادە ەتكەن.
كۇدىكتى ءوز «قىزمەتى» ءۇشىن جابىرلەنۋشىلەردەن جالپى سوماسى 1 ملن 200 مىڭ تەڭگەدەن استام قاراجات العان. الايدا اقشا بەرىلگەننەن كەيىن ازاماتتار ۋادە ەتىلگەن مەديتسينالىق قۇجاتتاردى دا, قاراجاتتى دا الا الماعان. وسىدان كەيىن ولار قۇقىق قورعاۋ ورگاندارىنا جۇگىنگەن.
جەدەل-ىزدەستىرۋ ءىس-شارالارى بارىسىندا پوليتسيا قىزمەتكەرلەرى كۇدىكتىنىڭ جەكە باسىن انىقتادى. ول جەرگىلىكتى مەديتسينالىق پۋنكتتەردىڭ بىرىندە جۇمىس ىستەيتىنى بەلگىلى بولدى. قازىرگى ۋاقىتتا اتالعان ءۇش دەرەك بويىنشا سوتقا دەيىنگى تەرگەۋ جۇرگىزىلىپ جاتىر, سونداي-اق ونىڭ باسقا دا ۇقساس قىلمىستارعا قاتىسى تەكسەرىلۋدە.
سونىمەن قاتار تەرگەۋ بارىسىندا ارىزدانۋشىلاردىڭ ارەكەتتەرىنە دە قۇقىقتىق باعا بەرىلەتىن بولادى. سەبەبى اسكەري قىزمەتتەن زاڭسىز جالتارۋ ارەكەتى دە زاڭ الدىندا جاۋاپكەرشىلىككە اكەلۋى مۇمكىن.
چەكتى كاسسادا قالدىرماڭىز: مەملەكەتتىك كىرىستەر كوميتەتى الاياقتىقتىڭ جاڭا ءتۇرى تۋرالى ەسكەرتتى
قۇقىق قورعاۋ ورگاندارى ازاماتتارعا اقشالاي سىياقى ءۇشىن اسكەري قىزمەتكە قاتىستى كەز كەلگەن «ماسەلەنى شەشۋ» ۇسىنىستارى زاڭسىز ەكەنىن ەسكەرتەدى. كوپ جاعدايدا مۇنداي ۋادەلەردىڭ ارتىندا الاياقتىق سحەمالار جاسىرىلادى.
سونداي-اق سىبايلاس جەمقورلىق سيپاتىنداعى ارەكەتتەرگە قاتىسۋ, ءتىپتى «كليەنت» رەتىندە دە, اكىمشىلىك نەمەسە قىلمىستىق جاۋاپكەرشىلىككە سوقتىراتىنىن ەستە ۇستاۋ ماڭىزدى.
زاڭسىز ديپلوم: اباي وبلىسىندا دارىگەر بولعىسى كەلگەن ازامات الاياقتىڭ قۇرىعىنا ءتۇستى
پوليتسيا ازاماتتاردى قىراعى بولۋعا جانە وسىنداي فاكتىلەر تۋرالى دەرەۋ قۇقىق قورعاۋ ورگاندارىنا حابارلاۋعا شاقىرادى.
