فەستيۆالدىڭ باستى ەرەكشەلىگى – ونىڭ حالىقارالىق فورماتتا ءوتۋى. ءىس-شاراعا الەمنىڭ ءار تۇكپىرىنەن كەلگەن تانىمال اسپازدار قاتىسىپ, ءوز ەلدەرىنىڭ ۇلتتىق تاعامدارىن ۇسىنىپ قانا قويماي, كاسىبي تاجىريبەلەرىمەن ءبولىستى. اتاپ ايتقاندا, بەلگيا, شۆەيتساريا, فرانتسيا, تۇركيا, گرۋزيا, ازەربايجان, رەسەي, قىرعىزستان جانە وزبەكستاننان كەلگەن حالىقارالىق بايقاۋلاردىڭ جەڭىمپازدارى كورەرمەن نازارىنا اۆتورلىق مازىرلەرىن ۇسىندى. بۇل فەستيۆالدىڭ مارتەبەسىن ارتتىرىپ, ونى كاسىبي گاسترونوميالىق ديالوگ الاڭىنا اينالدىردى.
فەستيۆال اياسىندا وتكەن بايقاۋلار جوعارى دەڭگەيدەگى باسەكەمەن ەرەكشەلەندى. قاتىسۋشىلار ۇلتتىق داستۇرلەردى ساقتاي وتىرىپ, زاماناۋي اسپازدىق تەحنولوگيالاردى شەبەر ۇشتاستىرا ءبىلدى. قازىلار القاسىنىڭ شەشىمىمەن «ەڭ جاقسى پالاۋ» اتالىمى Grand Golden Hills مەيرامحاناسىنا, «ەڭ ءدامدى سامسا» نوميناتسياسى Qazaq Samsa مەيرامحاناسىنا بەرىلدى. ال «ەڭ ۇزدىك ۇلتتىق تاعام» اتالىمىندا «پونتوس» مەيرامحاناسى جەڭىمپاز اتاندى. «كامال اتا» كافەسى بەلسەندى قاتىسقانى ءۇشىن ارنايى ماراپاتقا يە بولدى.
حالىقارالىق مازمۇن جەرگىلىكتى رەستوراتورلاردىڭ بەلسەندىلىگىمەن ۇيلەسىم تاپتى. فەستيۆالگە قالاداعى 50-گە جۋىق مەيرامحانا قاتىسىپ, كەلۋشىلەرگە ۇلتتىق جانە الەمدىك اسحانانىڭ كەڭ تاڭداۋىن ۇسىندى. قوناقتار قازاقتىڭ ءداستۇرلى تاعامدارىنان باستاپ, ەۋروپالىق جانە ازيالىق اس مازىرلەرىن تاماشالاپ, ءدام تاتۋ مۇمكىندىگىنە يە بولدى. سونىمەن قاتار, ناۋرىز مەرەكەسىنىڭ باستى تاعامى – ناۋرىز كوجەنىڭ بىرنەشە ءتۇرى ۇسىنىلىپ, مەرەكەلىك داستارحاننىڭ اجارىن اشا ءتۇستى.
«DamDastour»: شەتەلدىك اسپازدار شىمكەنت تۇرعىندارىنا ەرەكشە ءدام ۇسىنادى
ءىس-شارانىڭ حالىقارالىق سيپاتى مادەني باعدارلامادان دا ايقىن كورىنىس تاپتى. ءبىر ساحنادا ءتۇرلى مادەني باعىتتار مەن زاماناۋي ترەندتەر توعىسىپ, street style جانە K-pop بي سايىستارى, ۇلتتىق دومبىرا ونەرى, باتىرلار شوۋى, تسيرك قويىلىمدارى كورەرمەندەرگە ۇسىنىلدى. سونىمەن قاتار, موتوشەرۋ مەن اۆتوشوۋ, قولونەرشىلەر جارمەڭكەسى جانە ارنايى تاقىرىپتىق ايماقتار فەستيۆال مازمۇنىن بايىتىپ, ونى كوپقىرلى مادەني الاڭعا اينالدىردى.
وسىلايشا, «DamDastour» حالىقارالىق گاسترونوميالىق فەستيۆالى شىمكەنت قالاسىنىڭ حالىقارالىق دەڭگەيدەگى مادەني جانە گاسترونوميالىق ورتالىق رەتىندەگى الەۋەتىن ايقىن كورسەتتى. ءتۇرلى حالىقتاردىڭ اسحاناسى مەن ءداستۇرىن توعىستىرعان بۇل اۋقىمدى شارا ناۋرىز مەيرامىنىڭ رۋحىن زاماناۋي فورماتتا جاڭعىرتىپ, قالا ومىرىندەگى ماڭىزدى ءارى جارقىن وقيعالاردىڭ ءبىرى رەتىندە جوعارى باعالاندى.
شىمكەنتتە ناۋرىز مەرەكەسى اياسىندا «DAMDASTOUR» حالىقارالىق گاسترونوميالىق فەستيۆالى ءوتىپ جاتىر
