كەيىنگى جىلدارى وڭاي ولجاعا كەنەلگىسى كەلەتىن, ەش قيىندىقسىز قاراجات تابۋدى ماقسات ەتكەن الاياقتاردىڭ جاڭبىردان كەيىنگى ساڭىراۋقۇلاقتاي قاپتاپ كەتكەنى انىق. ولار قۇرعان الاياقتىق جۇيەنىڭ قاقپانىنا ءتۇسىپ, ارتىنان اھ ۇرىپ جاتقان قاراپايىم حالىق از ەمەس. قۇزىرلى ورگان وكىلدەرى شاعىن اۋداندارداعى اۋلالاردى شارلاپ, قاۋىپسىزدىك شارالارىن جان-جاقتى جۇرگىزىپ جاتسا دا, ناپاقاسىن الاياقتاردىڭ شوتىنا اۋدارعان اڭعال جۇرت ازايار ەمەس.
«ەل ازاماتتارىن الداپ سوعىپ, قاراجاتىن قالتاسىنا باساتىن الاياقتارعا قارسى كۇرەس كەيىنگى بىرنەشە جىلدىڭ بەدەرىندە قارقىندى جۇرگىزىلىپ جاتقانى ءمالىم. بۇل – قوعامداعى وزەكتى ماسەلەنىڭ ءبىرى. وكىنىشكە قاراي, جىل سايىن جەرلەستەرىمىز الەۋمەتتىك جەلىلەردەگى, ينتەرنەت-رەسۋرستارداعى, YouTube ارنالار مەن مەسسەندجەرلەردەگى جارنامالاردىڭ قۇربانىنا اينالىپ جاتىر. جۇرت كوبىنە قارجىلىق پيراميدالار قۇرعان الاياقتىق جۇيەنىڭ قۇربانى بولادى. مۇنداي دەرەك ءجيى قايتالاناتىنىن بايقاپ ءجۇرمىز. ماسەلەن, 2024 جىلى جابىرلەنۋشىلەردەن تۇسكەن ارىزدار نەگىزىندە وبلىستا قارجىلىق مونيتورينگ اگەنتتىگى 3 قىلمىستىق ءىس تىركەگەن ەدى. ال وتكەن جىلى 4 بىردەي قىلمىستىق ءىس انىقتالدى. ونىڭ ىشىندە قىلمىستىق كودەكستىڭ 217-1-بابىندا كوزدەلگەن قارجىلىق پيراميدانى زاڭعا قايشى جارنامالاۋ دەرەگى دە بار», دەيدى وبلىس بويىنشا ەكونوميكالىق تەرگەپ-تەكسەرۋ دەپارتامەنتى باسشىسىنىڭ ورىنباسارى نۇربول راحمەتوۆ.
دەپارتامەنت باسشىسىنىڭ ورىنباسارى كەلتىرگەن دەرەككە جۇگىنسەك, حالىقتى الداۋ مەن توناۋدى ادەتكە اينالدىرعان الاياقتاردان زارداپ شەككەندەر سانى سيرەمەي تۇر. ناقتىراق ايتساق, كەيىنگى ءۇش جىلدا ءوڭىر بويىنشا 200-دەن اسا ازامات قارجىلىق پيراميدالاردىڭ قۇربانىنا اينالىپتى. بۇل تەك رەسمي دەرەك. قۇزىرلى ورگاندارعا جۇگىنبەگەندەر قانشا ەكەنى بەلگىسىز.
«الاياقتاردىڭ قۇرىعىنا ىلىنگەن ازاماتتار قىلمىسكەرلەر ۋادە ەتكەن كوزسىز پايدا ەشقاشان قايتارىلمايتىنىن قاپەردەن شىعارماعانى ابزال. ال تۇرعىندار الاياقتىق دەرەگى بويىنشا ارىز ءتۇسىرىپ, قۇزىرلى ورگاندارعا جەدەل جۇگىنسە, قاراجاتتى قايتارۋ ىقتيمالدىلىعى جوعارىلاي تۇسەدى. جۇرتشىلىق وسىنى ەستەن شىعارماسا دەيمىز.
دەپارتامەنت قىزمەتكەرلەرى كەلتىرىلگەن زالالدى وتەۋ جانە ۇيىمداستىرۋشىلار العان قىلمىستىق كىرىستى انىقتاۋ ماقساتىندا قولدان كەلگەن شارانىڭ ءبارىن قابىلداپ جاتىر. ماسەلەن, 2025 جىلعى تەرگەپ-تەكسەرۋ بارىسىندا دەپارتامەنت قىزمەتكەرلەرى قابىلدانعان شارالار ناتيجەسىندە زارداپ شەككەن ازاماتتارعا 11 ملن تەڭگەدەن اسا كەلتىرىلگەن زالال وتەلدى. جالپى, كەيىنگى 3 جىل ارالىعىندا 56 ملن تەڭگە كولەمىندە زالال وتەلگەنىن ايتا كەتكەن ءجون», دەيدى ن.راحمەتوۆ.
قارجىلىق مونيتورينگ اگەنتتىگىنىڭ كەڭ اۋقىمدى وپەراتسياسىنىڭ ناتيجەسىندە بىرنەشە قارجىلىق ۇيىمنىڭ جولى كەسىلىپتى.
«2025 جىلى ەلىمىزدىڭ بارلىق وڭىرىندە تۇتىنۋ كووپەراتيۆىنىڭ اتىن جامىلعان «اسار باسپانا» قارجىلىق پيراميدا ۇيىمىنىڭ زاڭسىز قىزمەتى توقتاتىلدى. جالپى العاندا, كومپانيالاردىڭ كەڭسەلەرىندە جانە كۇدىكتىلەردىڭ تۇرعىلىقتى جەرى بويىنشا جۇرگىزىلگەن ءتىنتۋ بارىسىندا 1,1 ملرد تەڭگەدەن اسا قولما-قول اقشا جانە اراسىندا پرە-ميۋم كلاستاعى كولىكتەر بار 10 اۆتوكولىك تاركىلەندى», دەيدى دەپارتامەنت باسشىسىنىڭ ورىنباسارى.
قالاي دەسەك تە سانا جاڭعىرمايىنشا, اڭعال حالىق اككىلەر قازعان اپانعا ءتۇسۋدى توقتاتپايتىن سەكىلدى. الاياقتاردىڭ ارباۋىنا تۇسكەن ازاماتتاردىڭ سانى جىل وتكەن سايىن ازايماي وتىرعانى وسىنى اڭعارتادى. وكىنىشتىسى دە – سول.
جامبىل وبلىسى
