وڭتۇستىك قازاقستاندا پولياك كاسىپكەرلەرى الما باعىن وسىرمەكشى

استانا. 26 ماۋسىم. قازاقستاننىڭ پولشاداعى ەلشىلىگىنىڭ ۇيىمداستىرۋىمەن قازاقستان مەن پولشا مەملەكەتتەرى اراسىنداعى ىنتىماقتاستىقتى, ساۋدا-ەكونوميكالىق بايلانىستى ارتتىرۋ ماقساتىندا ۆارشاۆا قالاسىندا ەكى ەلدىڭ بيلىك وكىلدەرى, قوعام قايراتكەرلەرى, دەپۋتاتتار مەن كاسىپكەرلەردىڭ قاتىسۋىمەن جيىن بولىپ ءوتتى. بۇل تۋرالى تۇلكىباس اۋدانى اكىمىنىڭ ءباسپاسوز قىزمەتىنە سىلتەمە جاساعان «قازاقپارات» حابارلادى. وسى ورايدا, ەكى مەملەكەت اراسىندا «KZ-EURO-PL» ەۋرازيالىق پالاتاسى قۇرىلدى. پالاتانىڭ قۇرامىندا ماشينا جاساۋ, اگرارلىق ونەركاسىپ, ەنەرگەتيكا, قۇرىلىس سالالارى بويىنشا جۇمىس اتقاراتىن پولشانىڭ جەتەكشى كومپانيالارى جانە 70-تەن استام ورتا كاسىپورىندارى كىردى. ەۋرازيالىق پالاتا قازاقستاندا «KZ-EURO-PL» پيلوتتىق باعدارلاماسىن اقتوبە, قاراعاندى, الماتى, وڭتۇستىك قازاقستان وبلىستارى جانە استانادا ىسكە اسۋىنا قولعابىس كورسەتەدى. «KZ-EURO-PL» باعدارلاماسىن جۇزەگە اسىرۋ شەڭبەرىندە وڭتۇستىك قازاقستان وبلىسى تۇلكىباس اۋدانىنىڭ اكىمى «KZ-EURO-PL: اگروسادى» اگرالىق كومپانيالار كونسورتسيۋمىمەن اتالعان اۋدان اۋماعىندا ءونىمدى الما باقتارىن ەگۋ تۋرالى مەموراندۋمعا قول قويدى. بۇل جوبانى ىسكە اسىرۋ بويىنشا جاۋاپكەرشىلىك پولشانىڭ «ARNO» كومپانياسىنا جۇكتەلدى. سونىمەن قاتار تۇلكىباس اۋدانىندا جەمىس-جيدەك ساقتايتىن لوگيستيكالىق ورتالىق سالۋ جوسپارلانىپ وتىر. اتالمىش جوبانى ىسكە اسىرۋ تۋرالى مەموراندۋمعا اۋدان اكىمى ق.ابدۋاليەۆپەن «Polfrost» كولىك-لوگيستيكالىق كومپانياسى اراسىندا قول قويىلدى. تالعات رايىمبەك. دەرەك: «قازاقپارات». سۋرەت: 24.kz.